जल संरक्षण म बनिस अंतरराष्ट्रीय कीर्तिमान

कबीरधाम जिला ह रचिस इतिहास, एके दिन म बनाइस दू वर्ल्ड रिकॉर्ड
गोल्डन बुक ऑफ वर्ल्ड रिकॉर्ड्स म दर्ज होइस कबीरधाम जिला के नाम
कबीरधाम, छत्तीसगढ़ के कबीरधाम जिला जल संरक्षण म जनभागीदारी के मिसाल बन गए हे। जिला म वर्षा जल संचयन ल लेके चलाए गए “मोर गांव-मोर पानी” महाअभियान के तहत एके दिन म दू वर्ल्ड रिकॉर्ड बनाके जिला ह देश-विदेश म अपन अलग पहिचान बनाय हे। गोल्डन बुक ऑफ वर्ल्ड रिकॉर्ड्स कोति ले जिला ल सबले जादा सोख पिट निर्माण अऊ एक दिन म सबले जादा मनखे मन से जल संरक्षण के शपथ लेहे के उपलब्धि बर सम्मानित करे गए हे।
कबीरधाम जिला म केवल 12 घंटा के भीतर जिला के 999 गांव मन म 1,02,098 सोख पिट बनाय गीस, उहें 1,17,504 नागरिक मन ह जल संरक्षण के शपथ लेके पर्यावरण बचाय के संकल्प लीन। ए अभूतपूर्व सफलता बर गोल्डन बुक ऑफ वर्ल्ड रिकॉर्ड्स के एशिया प्रमुख श्री मनीष विश्नोई खुद कवर्धा पहुंचिन अऊ कलेक्टर श्री गोपाल वर्मा अउ जिला पंचायत सीईओ श्री अजय कुमार त्रिपाठी ल प्रोविजनल वर्ल्ड रिकॉर्ड प्रमाण पत्र सौंपिन।
मुख्यमंत्री श्री विष्णुदेव साय अऊ उपमुख्यमंत्री श्री विजय शर्मा के मार्गदर्शन म संचालित ए महाअभियान ल बड़का जनसमर्थन मिले हे अऊ ये उल्लेखनीय उपलब्धि हासिल होए हे। जल संरक्षण ल लेके राज्य म व्यापक जन-जागरूकता अभियान अऊ जलसंरक्षण बर सोख पिट के निर्माण करे जात हे। कलेक्टर श्री गोपाल वर्मा अऊ सीईओ श्री त्रिपाठी के अगुवइ म जलसंरक्षण के ये अभियान सही म जन-जन के आंदोलन बन गए हे।
कलेक्टर श्री गोपाल वर्मा के कहना हे कि ये केवल प्रशासनिक सफलता न ही, बल्कि जिला के हर नागरिक के सामूहिक चेतना अऊ समर्पण के प्रतिफल हे। ए अभियान म महिला स्व-सहायता समूह, छात्र, शिक्षक, सामाजिक संगठन, जनप्रतिनिधि अऊ मीडिया सबो ह उत्साहपूर्वक भागीदारी निभाए हे। उमन ए उपलब्धि ल जिला के जागरूक जनता ल समर्पित करत कहिन के ये उपलब्धि छत्तीसगढ़ राज्य ल घलोक राष्ट्रीय-अंतरराष्ट्रीय मंच म गौरवान्वित करे हे।
जिला पंचायत सीईओ श्री अजय कुमार त्रिपाठी ह कहिन कि ये अभियान सिरिफ एक कार्यक्रम न ही बल्कि जल संरक्षण के दिशा म स्थायी जागरूकता के सूत्रपात हे। उमन कहिन के अवइया समय म ए अभियान ल सतत् रूप ले आगू बढ़ाए जाही। कबीरधाम जिला के ये उपलब्धि न केवल छत्तीसगढ़ बल्कि पूरा देश बर एक प्रेरणा हे।