रायपुर, अंतर्राष्ट्रीय महिला दिवस के अवसर म जिला न्यायालय परिसर रायपुर म जिला विधिक सेवा प्राधिकरण रायपुर कोति ले कोविड-19 के प्रोटोकाल के पालन करत कार्यक्रम के आयोजन करे गीस। कार्यक्रम म जिला के जम्मो न्यायाधीश, पैरालीगल वॉलिटियर, अधिवक्तागण, न्यायालयीन अधिकारी अऊ कर्मचारीगण अऊ समाज सेवी उपस्थित रहिन।
कार्यक्रम के शुभारंभ अध्यक्ष अऊ जिला न्यायाधीश श्री अरविंद कुमार वर्मा ह दीया जलाके करिन। जिला न्यायाधीश ह जिला के सम्मानित महिला मन ल अंतराष्ट्रीय महिला दिवस बर शुभकामना देवत कहिन कि, हमार देश म साल के पूरा 365 दिन अंर्तराष्ट्रीय महिला दिवस होथे। सांकेतिक रूप ले आज ये दिवस ल हम बड़का रूप म मनावत हन, फेर महिला मन के भूमिका समाज, देश, संस्कृति के उत्थान म पूरा साल प्रतिबिम्बित होथे। ते पाए के महिला मन के प्रति मान सम्मान अऊ ऊंखर कानूनी अधिकार के रक्षा हर हमेसा होना चाही।
वरिष्ठ महिला न्यायाधीश श्रीमती लीना अग्रवाल ह महिला मन के न्यायपालिका म भूमिका के संबंध म जानकारी दीन। उमन बताइन कि आज हर क्षेत्र म महिला मन के योगदान देश के प्रगति म सतत रूप ले सहयोग प्रदान करत हे।
जिला विधिक सेवा प्राधिकरण के सचिव श्री प्रवीण मिश्रा ह बताइस कि, जिला विधिक सेवा प्राधिकरण ह आज के दिन विशेष रूप ले अभियान चलावत हे। करीबन सैंकड़ा के संख्या म जागरूकता शिविर करके महिला मन के अधिकार के जानकारी पहुंचाए के प्रयास करे जात हे। जेमां महिला पैरालीगल वॉलिटियर अऊ महिला पेनल अधिवक्तागण घर-घर जाके, बस स्टॅण्ड, रेल्वे स्टेशन अऊ आन सार्वजनिक स्थान मन म महिला मन के संवैधनिक, कानूनी अधिकार मन के बारे म ओ मन ल अवगत कराहीं अऊ करीबन एक हजार शिविर के लक्ष्य आज के दिन तय करे गए हे। कार्यक्रम के बाद म महिला न्यायिक अधिकारीगण, पैरालीगल वॉलिटियर ल अंतराष्ट्रीय महिला दिवस म उत्कृष्ट काम बर सम्मानित करे गीस।
ब्रम्हांड के जम्मो शक्ति नारी म समाहित हे अऊ वोकरे शक्ति के परिनाम ये के ये संसार जीवन्त हे
