छत्तीसगढ़ म 6800 करोड़ निवेश के प्रस्ताव, 3,000 नवा नौकरी – उद्योग अऊ पर्यटन म बड़का बदलाव के तैयारी

रायपुर, नई दिल्ली म आयोजित इन्वेस्टर कनेक्ट कार्यक्रम म छत्तीसगढ़ ल 6,800 करोड़ ले जादा के बड़का निवेश प्रस्ताव मिले हे, जेखर से राज्य म उद्योग अऊ पर्यटन ल नवा ताकत मिलइया हे। स्टील, ऊर्जा, होटल निर्माण अऊ वेस्ट-टू-एनर्जी जइसे क्षेत्र मन के दिग्गज कंपनी मन ह राज्य म निवेश करे म गहरी रुचि देखाए हें। कार्यक्रम के समय कुल 6,321.25 करोड़ के औद्योगिक निवेश अऊ 505 करोड़ के पर्यटन निवेश प्रस्ताव रखे गीस, जेखर से अवइया बछर म 3,000 ले जादा रोजगार आए के संभावना हे।
मुख्यमंत्री श्री विष्णुदेव साय ह कार्यक्रम म कहिन के छत्तीसगढ़ आज देश के सबले भरोसेमंद अऊ तेजी ले उभरत औद्योगिक गंतव्य हे। उमन बताइन के सिंगल विंडो सिसटम के सेती उद्योग मन खातिर अनुमति प्रक्रिया पहिली ले जादा सरल अऊ तेज हो गए हे। राज्य म कोयला, लौह अयस्क, बॉक्साइट, टिन अऊ लिथियम जइसे खनिज मन के प्रचुरता उद्योग मन खातिर बड़का आकर्षण हे। हाले म होए एनर्जी समिट म घलोक साढ़े तीन लाख करोड़ ले जादा निवेश प्रस्ताव मिले हे।
मुख्यमंत्री ह कहिन के छत्तीसगढ़ देश के स्टील हब हे, जिहां भिलाई अउ नगरनार स्टील प्लांट के संग MSME आधारित हजारों इकाइ कार्यरत हे। ग्रीन स्टील अऊ नवीकरणीय ऊर्जा के क्षेत्र म घलोक राज्य तेजी ले आगू बढ़त हे।
पर्यटन ल लेके उमन बताइन के बस्तर अब निवेश अऊ पर्यटन के नवा केंद्र बनत हे। नक्सल घटना म गिरावट, सड़क अऊ इंटरनेट म सुधार अऊ बेहतर सुरक्षा ह क्षेत्र ल नवा पहिचान देहे हे। पर्यटन ल उद्योग के दर्जा देहे अऊ होम-स्टे, ट्राइबल टूरिज्म जइसे नीति मन ले नवा अवसर बनत हे।
कार्यक्रम म कई प्रसिद्ध कंपनियों ह वेस्ट-टू-एनर्जी प्लांट, होटल निर्माण, स्टील प्लांट विस्तार, मेडिकल उपकरण निर्माण अऊ इथेनॉल प्लांट जइसे बड़का प्रोजेक्ट्स प्रस्तुत करिन, जेकर से छत्तीसगढ़ के औद्योगिक अऊ पर्यटन भविष्य ल मजबूत आधार मिलही।