चेक डैम ले सिंचाई बर मिले लगिस भरपूर पानी

मनरेगा ले बने चेक डैम ह दूर करिस जल संकट, खेती बनिस आसान
बिलासपुर, मनरेगा ले बनाय गए चेक डैम ले किसान मन ल सिंचाई बर भरपूर पानी मिलत हे, संगेच ए ह जल स्रोत मन के जलस्तर ल घलोक बढ़ावत हे। बिलासपुर जिला के बिल्हा विकासखंड के कोरबी ग्राम पंचायत म पांच लाख 27 हजार रुपिया के लागत ले मनरेगा ले बने चेक डैम ह मनखे मन के जिंदगी बदल देहे हे। गाँव के प्यास बुझाए अऊ खेत मन के हरियाली लहुटाए म ये अहम साबित होवत हे। सिंचाई बर पानी मिले ले अब इहां के किसान दू ले तीन फसल घलोक लेवत हें।
चेक डैम बने के बाद क्षेत्र म जल संरक्षण अऊ सिंचाई के स्थिति म बड़का सुधार आए हे। अब मानसून के बाद घलोक लंबा समय तक पानी उपलब्ध रहिथे। खेत मन ल सिंचाई बर भरपूर पानी मिले लगे हे, जलस्तर बाढ़े हे अऊ गांव वाले मन ल पेयजल संकट ले राहत मिले हे। खेत मन तक समय म पानी पहुंचे ले पैदावार म घलोक बढ़ोतरी होए हे। कोरबी ग्राम पंचायत के ये चेक डैम जल संचय अऊ जल संरक्षण के सफल उदाहरण बन गए हे।
कोरबी के मनखे मन बताथें के पहिली गांव म नरवा के पानी ह बोहा जात रहिस, जेखर से खेत सूक्‍खा रहय अऊ सिंचाई नइ हो पात रहिस। जल संचय के व्यवस्था नइ होए ले बारिश के पानी के सदुपयोग नइ हो पात रहिस जेखर से खेती बर हमेशा जल के अभाव बने रहय। मनरेगा ले बने चेक डैम ह अब गांव वाले मन ल कई समस्या ले निजात देवा देहे हे।