मुंगेली 23 अप्रैल 2020// मुंगेली जिला मुख्यतः कृषि म निर्भर हावय जेखर कारण लाॅकडाउन म घलो एहाँ बडे़ इस्तर म सिंचाई परियोजना, एनीकट अउ नहर लाइनिंग के काम करे जात हवे। एन काम के पूरा होय म सिंचाई के रकबा म बढ़ोतरी होही । जेखर कारण किसान म समृद्धि अहि। जल संसाधन विभाग के कार्य पालन अभियंता श्री एन. एस. राज ह आज बताइन कि जिला के विकास खण्ड लोरमी म मनियारी नदी के गाँव कंसरा म चार करोड 26 लाख 87 हजार रूपया लागत ले एनीकट के निर्माण करे जात हवय। जेन काम से लगभग 1 हजार परिवार ल रोजगार मिलत हे। अइसने सहसपुर व्यपवर्तन अउ लोरमी वितरक नहर म घलोक लाइनिंग के काम कराय जात हे। लाॅकडाउन म लोगन मन ल रोजगार देय खातिर बघर्रा जलाशय के सुदृढीकरण अउ अमरपुर म एनीकट निर्माण के काम करे जात हे। अहू काम ले 1 हजार मनखे मन शामिल होके रोजगार पावत हावयं। एखर अलावा आगर व्यपवर्तन योजना के अंतर्गत बने नहर अउ डी. वन नहर के वितरक नहर म लाइनिंग के काम कराय जावत हे।अउ डी. वन नहर म कुल निर्माण के काम चलत हे।
जल संसाधन विभाग के कार्य पालन अभियंता श्री राज ह बताइन कि लोरमी विकास खण्ड म लगभग 89 बझर पुराना खुड़िया जलाशय वृहद परियोजना अउ मुंगेली विकास खण्ड म स्थित आगर व्यपवर्तन योजना दूसर महत्वपूर्ण योजना हावय। जेमा पुनरूद्धार अउ नहर लाइनिंग के काम करवाय जात हे।
मुंगेली ले गुरतुर गोठ बर दिलीप बसंत
