लोक स्वास्थ्य यांत्रिकी अउ ग्रामोद्योग मंत्री ह महिला मन ल बांटिन ई-रिक्शा
रायपुर 29 जनवरी 2020। लोक स्वास्थ्य यांत्रिकी अउ ग्रामोद्योग मंत्री गुरु रूद्रकुमार ह आज अपन शासकीय घर सतनाम सदन (धरोहर) म महिला हितग्राही मन ल ई-रिक्शा बांटिन। मंत्री गुरु रूद्रकुमार ह ये मौका म कहिन कि मुख्यमंत्री श्री भूपेश बघेल के सियानी म राज्य सरकार के मंशा मुताबिक महिला सशक्तिकरण बर जादा ले जादा महिला मन ल रोजगारोंमुखी बनाए जात हे। मंत्री गुरु रूद्रकुमार ह शासन कोति ले संचालित योजना मन के तहत भवन अउ आन संनिर्माण कर्मकार कल्याण मंडल के चार महिला हितग्राही मन ल ई-रिक्शा प्रदान करिन। उमन कहिन कि राज्य सरकार सर्वोच्च प्राथमिकता के संग महिला मन ल शासन के योजना मन ले लाभान्वित करके स्वरोजगार उपलब्ध करा के ओ मन ल स्वावलंबी बनावत हे। उमन ई-रिक्शा के फायदा ल बतात कहिन कि पर्यावरण संरक्षण के दृष्टि ले ये जरूरी हे। संगेच पर्यावरण संरक्षण बर मनखे मन म संदेश तको जात हे। मंत्री गुरु रूद्रकुमार ह ये मौका म ई-रिक्शा ल खुदे चला कर देखिन। ये बेरा महिला हितग्राही मन संग बड़ संख्या म मनखे मौजूद रहिन।
