- छत्तीसगढ़ म अब तक करीबन पांच लाख प्रवासी मजदूर वापस लहुटिन: अभी घलोक लहुटना हे जारी
- प्रवासी अऊ राज्य के श्रमिक मन ल तुरंते रोजगार उपलब्ध कराना जरूरी
- मध्यप्रदेश, झारखण्ड अउ उड़ीसा पड़ोसी राज्य के संग ही भौगोलिक, आर्थिक अऊ सामाजिक स्थिति म समान फेर छत्तीसगढ़ ल छोड़ देहे गीस
- गरीब कल्याण रोजगार अभियान म छत्तीसगढ़ ल सामिल नइ करे ले राज्य के गरीब, कृषि मजदूर, प्रवासी मजदूर अउ सीमांत किसान मन म बहुत निराशा के भाव
रायपुर 21 जून 2020। मुख्यमंत्री श्री भूपेश बघेल ह प्रधानमंत्री श्री नरेन्द्र मोदी ल चिट्ठी लिखके उंखर से छत्तीसगढ़ राज्य ल ’गरीब कल्याण रोजगार अभियान’ म तुरंते सामिल करे के अनुरोध करे हें। उमन चिट्ठी म लिखे हें के ’गरीब कल्याण रोजगार अभियान’ म छत्तीसगढ़ के सबो जिला मन ल सामिल करे ले राज्य के सबो प्रवासी श्रमिक मन के जीवकोपार्जन बर उंखर रूचि अउ कौशल के मुताबिक रोजगार अउ स्वरोजगार के अवसर प्राप्त हो सकही।
श्री बघेल ह चिट्ठी म लिखे हें के भारत सरकार ह प्रवासी कामगार मन ल आजीविका के अवसर प्रदान करे बर 20 जून के बिहार के खगड़िया जिला ले देश के 6 राज्य मन के 116 जिला मन म ’गरीब कल्याण रोजगार अभियान’ के शुभारंभ करे हे, जेमां बिहार, उत्तर प्रदेश, मध्यप्रदेश, राजस्थान, झारखण्ड अउ उड़ीसा राज्य ल सामिल करे गए हे। योजना म सामिल मध्यप्रदेश, झारखण्ड अउ उड़ीसा, छत्तीसगढ़ के पड़ोसी राज्य हे फेर छत्तीसगढ़ ल छोड़ दे गए हे जबकि सम्मिलित ए राज्य मन के भौगोलिक, आर्थिक अउ सामाजिक स्थिति मन म काफी समानता हे।
मुख्यमंत्री ह चिट्ठी म लिखे हे के कोरोना वायरस कोविड-19 के परिणाम स्वरूप पूरा देश प्रभावित हे। ये भयंकर महामारी-त्रासदी के सेती रोज कमाए खाए वाले हमर सर्वहारा प्रवासी मजदूर वर्ग सबले जादा प्रभावित होय हे। ऊंखर अभी हाल कार्य स्थल मन म नियोजन-रोजगार के अवसर खतम होए के सेती प्रवासी मजदूर मन ल विवश होके गृह राज्य लहुटना परे हे। छत्तीसगढ़ राज्य म अब-तक करीबन 5 लाख प्रवासी मजदूर वापस आ गए हें। मजदूर मन के गृह राज्य म वापस लहुटना अभी घलोक जारी हे।
श्री बघेल ह लिखे हें के राज्य के करीबन तीन-चैथाई क्षेत्र बहुत पिछडा अउ वन क्षेत्र हे, जिहां राज्य के करीबन 80 प्रतिशत अनुसूचित जाति, जनजाति अउ पिछडा वर्ग के मनखे निवासरत हे। राज्य के करीबन 90 प्रतिशत जनसंख्या कृषि अउ सामान्य मजदूरी उपर निर्भर हे, जऊन आम तौर मं असंगठित क्षेत्र, कृषि मजदूर अउ सीमांत कृषक हें। राज्य के बस्तर, सरगुजा संभाग संग आन संभाग मन म आदिवासी वर्ग के बहुलता हे संगेच छत्तीसगढ़ म दस आकांक्षी जिला घलोक हे। ’गरीब कल्याण रोजगार अभियान’ म छत्तीसगढ़ ल सामिल नइ करे ले इहां के गरीब, कृषि मजदूर, प्रवासी मजदूर अउ सीमांत किसान मन म बहुत निराशा के भाव हे। ये हिसाब ले राज्य वापस लहुटे प्रवासी श्रमिक मन के संगें-साथ राज्य म निवासरत मजदूर मन ल घलोक तत्कालिक रूप ले रोजगार उपलब्ध कराना प्राथमिक जरूरत हे।
मुख्यमंत्री श्री बघेल ह प्रधानमंत्री श्री मोदी ले अनुरोध करत लिखे हें के छत्तीसगढ़ राज्य के समस्त जिला मन ल ’गरीब कल्याण रोजगार अभियान’ म तुरंत सामिल करे जाये ताकि राज्य के सबो प्रवासी श्रमिक मन के जीवकोपार्जन बर उंखर रूचि अउ कौशल के मुताबिक रोजगार अउ स्वरोजगार के अवसर प्राप्त हो सकही। मुख्यमंत्री ह विश्वास प्रकट करे हें के ये संबंध म राज्य के प्रवासी मजदूर मन के हितार्थ जल्दी निर्णय ले जाही।
