कवर्धा, महिला अऊ बाल विकास विभाग के एकीकृत बाल संरक्षण योजना के तहत मान्यता प्राप्त स्वयं सेवी संस्था स्नेह सर्वोदय सेवा संस्था राजनांदगांव कोति ले जिला मुख्यालय कवर्धा म विशेषीकृत दत्तक ग्रहण अभिकरण के संचालन करे जात हे। ये अभिकरण ले पाछू दिनन दू लइका मन ल इटली के विदेशी दंपत्ति ह गोद लीस। ये अभिकरण कोति ले पाछू पांच बछर म देश-विदेश के 18 निःसंतान दंपत्ति मन लइका मन ल गोद लेके अपन सुना गोद आबाद करे हें।
जिला बाल संरक्षण अधिकारी श्री सत्यनारायण राठौर ह बताइस कि विदेशी दम्पत्ति मन कोति ले भारतीय लइका मन ल गोद लेहे बर अधिकृत विदेशी दत्तक ग्रहण अभिकरण (आफा) अऊ केन्द्रीय दत्तक ग्रहण संसाधन प्राधिकारण (कारा) के माध्यम ले ऑनलाईन पंजीयन करके दत्तक म ले जात हे। एखर बर भावी दत्तक दम्पत्ति ल अपन पूरा जानकारी फोटो, आयु, स्वास्थ्य, आय, विवाह, निवास के सबूत, वचन पत्र, पुलिस सत्यापन संबंधित प्रमाण पत्र अऊ आन जरूरी कागद अपलोड करे जाना होथे। निःसंतान दम्पत्ति मन कोति ले प्रस्तुत कागद मन अऊ गृह अध्ययन रिर्पोट के सत्यापन करे जाथे। अंतर्राष्ट्रीय दत्तक ग्रहण बर दत्तक ग्रहण अभिसमय के अनुच्छेद 5-17 के अनुसार पवइया अऊ देवईया दूनो देश मन के अनुमति जरूरी होथे। दत्तक ग्रहण बर वेबसाईट कारा डॉट एनआईसी डॉट ए म ऑनलाईन पंजीयन करा सकत हें। श्री राठौर ह बताइस कि ए दूनो लइका मन ल बाल कल्याण समिति बेमेतरा कोति ले विशेषीकृत दत्तक ग्रहण अभिकरण अऊ बाल गृह कवर्धा भेजे गए रहिस। एखर बाद दत्तक ग्रहण बर कानूनी मुक्त करे के प्रक्रिया पूरा करे गीस। खुशी के बात रहिस कि करीबन 18 महिना बाद भारत सरकार के दत्तक ग्रहण योजना के तहत ईटली म रहइया विदेशी दम्पति ह दुनों लइका मन ल गोद लेहे के इच्छा जताईन अऊ सबो प्रक्रिया पूरा होए के बाद आज ये परिवार ल ओ मन ल सौप दे गीस। दूनो बच्चा भाई-बहिनी ये अऊ अलग-अलग संस्था मन म रहत रहिन। बालक के उमर 10 साल अऊ बालिका के उमर छै साल हे। ये बेरा म महिला अऊ बाल विकास विभाग के अधिकारी-कर्मचारी, विदेशी दम्पत्ति, संस्था के अध्यक्ष श्री एस.एम. शास्त्री, वकील अऊ डॉक्टर उपस्थित रहिन।
