नारायणपुर, नक्सल प्रभावित जिला नारायणपुर म भारत तिब्बत सीमा पुलिस बल के जवान नक्सल उन्मूलन अभियान के संगें-संग अंचल के जरूरतमंद मनखे मन के मदद घलोक करत हें। इही कड़ी म सोमवार 20 जनवरी के 53वां वाहिनी आईटीबीपी के ए कम्पनी सोनपुर कोति ले सिविक एक्सन कार्यक्रम के आयोजन करे गीस। जेमां अंदरूनी गांव मन के रहवइया मन ल रोजमर्रा के सामान बांटे के संगेच चिकित्सा शिविर अउ पशु चिकित्सा शिविर के घलोक आयोजन करे गीस। कार्यक्रम म उप सेनानी (आप्स) 53वां बटालियन आईटीबीपी श्री राजू नारायण वानखेड़े, ह गांव वाले मन ल संबोधित करत बताइन के आप मन आईटीबीपी ल अपन संगवारी समझव, हम आप मन सब के सेवा अउ सुरक्षा बर इहां तैनात हन। कहू कोनो ल कुछु समस्या होही त आप मन कभू भी कैम्प म आके हमला बता सकत हव। हमार जवान हमेशा आप मन के सेवा बर तियार हें। उमन बताइन कि गांव वाले मन के उत्थान म ये प्रकार के कार्यक्रम आगू घलोक आयोजित करे जाही अऊ सबो गांव वाले मन ल अउ खास करके युवा पीढी ले उमन अनुरोध करिन कि ओ मन हिंसा के रद्दा छोड़के देश के मुख्यधारा ले जुड़यं अउ खुशहाल जीवन व्यतीत करयं।
श्री पंकज कुमार वर्मा, सेनानी, 53वीं वाहिनी, ह सबो गांव वाले मन ल ये कार्यक्रम म सामिल होए अउ एला सुचारु रुप ले सफल बनाए म सबो के आभार व्यक्त करिन अउ धन्यवाद देवत ऊंखर उज्जवल भविष्य के कामना करिन। ये बेरा म वाहिनी के चिकित्सा अधिकारी डॉ. वी. विजय लक्ष्मी ह 107 मनखे मन के जांच करके निःशुल्क दवई दीन। उहें पशु चिकित्सक डॉ. एन मोहना सुन्दरम ह 251 पालतू पशु मन के चिकित्सा जांच करिन। सिविक एक्शन कार्यक्रम म सोनपुर, सरगीपाल, मुण्डाटेकरा, बेचागांव, गंगिया, अलनार, कुंदला, ओरछाकर्रा, ब्रेहबेड़ा अउ मुरनार गांव के गांव वाले मन ल कम्बल, बर्तन, जूता, महिला मन ल साड़ी चप्पल, स्वेटर, स्कूली बच्चा मन ल किताब, लेखन सामाग्री, खेल के सामान, खाना बनाए के बर्तन अउ किसान मन ल खेती बर उच्च गुणवत्ता वाले बीज, उर्वरक/खाद, हारवेस्टिगं स्ट्रक्चर अउ फलदार पौधा बांटे गीस। ये मौका म 53वां बटालियन आईटीबीपी, ए कम्पनी के सहायक सेनानी श्री खजान सिंह, सोनपुर थाना प्रभारी अउ स्थानीय गांव के सरपंच, महिला मंडल सदस्य, आंगनबाडी कार्यकर्ता, स्कुल के अध्यापक मन घलोक उपस्थित रहिन।
