देव लहरी. रायपुर, छत्तीसगढ़ के पहली तिहार हरेली म छत्तीसगढि़या मन के अस्मिता जगाए बर छत्तीसगढ़िया क्रान्ति सेना ह एक बड़का कार्यक्रम के रूप म ‘जबर हरेली रैली’ के आयोजन 21 तारीक को धमतरी म करवात हे। ये रैली अउ कार्यक्रम मा राज्य के लोक संस्कृति बस्तरिहा नृत्य, वनांचल गेड़ी नृत्य, पंथी नृत्य, राऊत नाचा, डंडा नृत्य, कर्मा सुवा ददरिया, अखाड़ा व पुरखा के झांकी के संग बैल गाड़ी के जूलुस निकाले जाही। ये रैली मंझनिया 11 बजे जुन्ना कृषि उपज मंडी बस स्टैंड ले निकल के शहर के कई ठन चौक ले होत बिलई माता मंदिर पहुंचके समापन होही।
संझा कन लाईव कार्यक्रम म नगरी सिहावा के ओजस्वी साहू आरू अपन प्रस्तुति देंहीं, 10 साल के बाल गायिका आरू यू ट्यूब अउ सोशल मीडिया म बिक्कट सुने-देखे जात हे, उमन सुरीली अवाज ले छत्तीसगढ़ी गीत मन ल एक नवा पहिचान दीए हें, छत्तीसगढ़ के पहली बायोपिक फिल्म मंदराजी के गीत ‘धनी बिना जग लागे सुन्ना’ म उमन अपन आवाज़ दिए हें। एकरे संग राष्ट्रपति ले सम्मानित युवा लोक गायक कन्ति कार्तिक यादव छत्तीसगढ़ी गीत मन के प्रस्तुति देंहीं, संगे म नांदगांव के प्रसिद्ध बांसुरी वादक ओम प्रकाश देवांगन घलोक जबर हरेली रैली के मंच म बांसुरी के धुन म छत्तीसगढ़ी गीत के प्रस्तुति देंहीं।
