जगदलपुर ले रायपुर अउर हैदराबाद नियमित विमान सेवा शुरू
विकास के क्षेत्र म बस्तर अब भरही नवा उड़ान
रायपुर, 21 सितंबर 2020। मुख्यमंत्री श्री भूपेश बघेल ह आज अपन निवास कार्यालय ले बस्तर जगदलपुर ले रायपुर अऊ हैदराबाद के हवाई यात्रा बर 72 सीटर नियमित विमान सेवा के वर्चुअल शुभारंभ करिन। जगदलपुर स्थित मां दंतेश्वरी एयरपोर्ट ले अब बस्तरवासी मन ल हवाई मार्ग ले रायपुर अऊ हैदराबाद आवागमन के सुविधा के लाभ मिलही। विमान सेवा के शुभारंभ अवसर म छत्तीसगढ़ शासन के मंत्रीगण, सांसद, संसदीय सचिव, विधायकगण संग बस्तर अंचल के जनप्रतिनिधि अऊ वरिष्ठ प्रशासनिक अधिकारी वीडियो कॉन्फ्रेंसिंग के माध्यम ले सामिल होइन।
मुख्यमंत्री श्री भूपेश बघेल ह ए अवसर म अपन उद्बोधन म कहिन के जगदलपुर ले विमान सेवा के शुरूआत करके हम बस्तर ल बड़का संभावना मन ले जोड़त हन, जऊन पूरा बस्तर संभाग के विकास ल नवा आयाम देही। उमन ए मौका म बस्तर ल हवाई सेवा ले जोरे के उदीम के बारे म परखर बतात कहिन के बस्तरवासी मन ल उड़ान सेवा के लाभ देहे बर शासन सरलग उदीम करत रहे हे। हमर सरकार के प्रयास ले 02 मार्च 2020 के डीजीसीए नई दिल्ली ले विमान उड़ान बर अनुमति मिलीस, जेखर परिणाम स्वरूप आज ले एयर इंडिया के सहायक कम्पनी एलायंस एयर बस्तर म उड़ान सेवा चालू करत हे।
मुख्यमंत्री ह कहिन के हवाई सेवा शुरू होए ले बस्तरवासी मन ल विकास के हर एक क्षेत्र म जादा ले जादा लाभ प्राप्त होही। बस्तर ले रायपुर अऊ हैदराबाद के सफर म सिरिफ एक घंटा लगही। हैदराबाद ले आगू विश्व म कहूँ जाए जा सकत हे। अभी हाल म सड़क मार्ग ले रायपुर के यात्रा 06 घंटा म पूरा होथे अऊ हैदराबाद के यात्रा लगभग 12 घंटा म पूरा होथे। यात्रा के समय घाटी अऊ दुर्गम रद्दा घलोक पार करना होथे। बस्तर के मनखे विषम हालत म चिकित्सा बर रायपुर, विशाखापटनम या हैदराबाद जइसे महानगर के हवाई यात्रा ले जल्द ले जल्द पहुंच सकही अऊ महानगर के चिकित्सक, हवाई सेवा के लाभ लेके बस्तरवासी मन ल आधुनिक चिकित्सा बस्तर म आसानी ले दे सकहीं। विमान सेवा के चालू होए ले बस्तर के पर्यटन ल बढ़ावा मिलही, जेखर से देश – विदेश के मनखे मन ल बस्तर के ऐतिहासिक अऊ सांस्कृतिक विरासत के जानकारी प्राप्त होही। पर्यटक बस्तर के यात्रा आसानी ले कर सकहीं।
मुख्यमंत्री ह कहिन के हवाई सेवा शुरू होए ले बस्तर संभाग म बैंकिंग, टेलीकॉम सेक्टर, एनएमडीसी, बचेली, किरन्दुल, नगरनार अऊ केंद्र अऊ राज्य शासन के प्रशासनिक अमला ल विशेष हालत म जल्दी यात्रा के सुविधा होही। बस्तर के युवा मन ल आधुनिक शिक्षा, उच्च शिक्षा बर व्यापक सुविधा प्राप्त होही। बस्तर के व्यापारी मन ल हर प्रकार के सेवा बर विशेष लाभ मिलही। बस्तर म कला, संस्कृति, खेल, रंगमंच अऊ आन क्षेत्र के हस्ति मन के आगमन होए ले बड़े आयोजन सफलतापूर्वक अल्प समय म पूरा हो सकही ।
मुख्यमंत्री ह कहिन के बस्तर जगदलपुर ले यात्री विमान सेवा प्रांरभ होए ले क्षेत्र के स्थानीय मनखे मन बर रोजगार के बहुत अकन अवसर खुलही। व्यापार, शिक्षा, चिकित्सा, पर्यटन जगत के अकतहा आन सबो रोजगारोन्मुखी क्षेत्र म व्यापक विकास अऊ विस्तार होही। ईही कड़ी म एयरपोर्ट टर्मिनल म आमचो बस्तर कैन्टीन के शुरूआत करे जात हे । कैन्टीन के संचालन नक्सल समर्पित कुटुंब के सदस्य मन करहीं। भविष्य म अइसन बहुत अकन पहल हम करबोन, जेखर से युवा प्रतिभा मन ल रोजगार के अच्छा अवसर प्राप्त होही।
मुख्यमंत्री ह ए मौका म एयरपोर्ट जगदलपुर म आमचों बस्तर केन्टीन के घलोक शुभारंभ करिस। जिला प्रशासन जगदलपुर के सौजन्य ले जगदलपुर ले रायपुर पहली पइत हवाई यात्रा करत बस्तर अंचल के कई क्षेत्र के रहवासी मन ह मुख्यमंत्री श्री भूपेश बघेल ल जगदलपुर ले विमान सेवा शुरू करे अऊ ओ मन ल हवाई यात्रा के सुअवसर प्रदान करे बर आभार जताइन। हवाई सेवा के शुभारंभ कार्यक्रम म वीडियो कांफ्रेंसिंग के माध्यम ले जुड़े मंत्री सर्वश्री रविन्द्र चौबे, टी.एस. सिंहदेव, ताम्रध्वज साहू, मोहम्मद अकबर, डॉ.प्रेमसाय सिंह टेकाम, कवासी लखमा, जयसिंह अग्रवाल, बस्तर के सांसद श्री दीपक बैज, बस्तर विकास प्राधिकरण के अध्यक्ष श्री लखेश्वर बघेल, संसदीय सचिव श्री रेखचंद जैन, विधायक श्री चंदन कश्यप, छत्तीसगढ़ मछुआ कल्याण बोर्ड के अध्यक्ष श्री एमआर निषाद, जगदलपुर के महापौर श्रीमती शकुंतला साहू संग आन जनप्रतिनिधि मन ह जगदलपुर ले विमान सेवा शुरू करे बर मुख्यमंत्री श्री भूपेश बघेल के आभार जतात कहिन के आप मन के उदीम ले बस्तरवासी मन के बहुप्रतीक्षित मांग पूरा हो गए हे अऊ आप मन के प्रयास ले बस्तर विकास के रद्दा म तेजी ले बढ़त हे।
ये मौका म केन्द्रीय विमानन राज्य मंत्री श्री हरदीप सिंह पूरा ह अपन संदेश म कहिन के हवाई सेवा शुरू होए ले जगदलपुर बस्तर म पर्यटन अऊ विकास ल बढ़ावा मिलही। उमन कहिन के बस्तर के कला-संस्कृति के अपन महत्व हे। उमन ए मौका म उड़ान योजना के माध्यम ले जगदलपुर, अम्बिकापुर एयरपोर्ट के विकास बर करे जात प्रयास अऊ रायपुर एयरपोर्ट के विस्तार के कार्ययोजना के जानकारी दीन। उमन जगदलपुर ल विमान सेवा ले जोड़े बर एयरपोर्ट अथारिटी, एयर इंडिया के सहायक कम्पनी अलायंस एयर, राज्य शासन, छत्तीसगढ़ अऊ बस्तरवासी मन ल बधाई अऊ शुभकामना दीन।
1939 म रखे गए रहिस जगदलपुर एयरपोर्ट के नींव
मुख्यमंत्री श्री भूपेश बघेल ह कहिन के जगदलपुर एयरपोर्ट के नींव सन् 1939 म दूसर विश्व युद्व के पहिली ब्रिटिश काल म रखे गए रहिस, तब एला जहाज भाटा के नाम ले जाने जात रहिस। 13 मार्च 1953 के भारत के पहिली प्रधानमंत्री पं. जवाहर लाल नेहरू ह घलोक बस्तर के ए जहाज भाटा म अपन कदम रखे रहिन। एखर ले अकतहा पूर्व राष्ट्रपति डॉ. राजेंद्र प्रसाद, डॉ ए.पी.जे. अब्दुल कलाम, डॉ प्रतिभा पाटिल अऊ पूर्व प्रधानमंत्री श्रीमती इंदिरा गांधी, श्री मोरारजी देसाई, श्री व्ही.पी.सिंह, श्री अटल बिहारी बाजपेयी जी जइसे महान विभूति मन घलोक ए पावन धरा म कदम रखें हें। 20 मार्च 1988 के जगदलपुर ले भोपाल के बीच वायुदूत सेवा के नाम ले उड़ान के शुरूआत तत्कालीन मुख्यमंत्री श्री मोतीलाल वोरा ह करे रहिन। श्री वोरा जी, अपन मंत्रीमंडल के सदस्य मन के संग पहिली यात्रा भोपाल ले जगदलपुर बर करे रहिन। जगदलपुर एयरपोर्ट के उपयोग सामरिक काम मन बर करे जात रहे हे।
मां दन्तेश्वरी के नाम ले जाने जाही जगदलपुर एयरपोर्ट
छत्तीसगढ़ सरकार कोति ले जगदलपुर एयरपोर्ट के नामकरण अंचल के आराध्य देवी माँ दन्तेश्वरी के नाम ले करे गए हे। मां दन्तेश्वरी एयरपोर्ट जगदलपुर कुल 57.6 हेक्टेयर के क्षेत्रफल म स्थापित हे। एयर स्ट्रिप के लम्बाई 1704 मीटर अऊ चौड़ाई 30 मीटर हे। एयरपोर्ट के आधारभूत सुविधा मन के प्रबंधन लोक निर्माण विभाग, छत्तीसगढ़ शासन ह करही। एयरपोर्ट म एयर ट्रॅिफक कंट्रोल के प्रबंधन एयरपोर्ट एथॉरिटी आफ इंडिया कोति ले करे जाही। एयरपोर्ट म 72 सीटर यात्री क्षमता वाले हवाई जहाज ल संचालित करे जा रहा हे। यात्री विमान भिनसरहा 9 बजे हैदराबाद ले उड़ान भरके जगदलपुर होत मंझन 12 बजे तक रायपुर पहुंचही। वापस हैदराबाद बर ये विमान रायपुर ले 12.30 बजे उड़ान भरके 1.35 बजे जगदलपुर पहुँचही अऊ उहां ले 2.05 बजे उड़ान भरके 3.40 बजे हैदराबाद पहुँचही।
मुख्यमंत्री श्री भूपेश बघेल ह बताइस के बस्तर के मनखे मन के सुविधा बर विमान मन के उड़ान प्रतिदिन करे जाना सुनिश्चित करे गए हे। टिकट के बुकिंग एलायंस एयर के वेबसाईट, ऐप अऊ टिकट काउण्टर के माध्यम ले करे जा सकत हे। यात्री किराया घलोक सबले कम रखे गए हे, जऊन ल आसानी ले वहन करे जा सकत हे। हैदराबाद ले जगदलपुर के 1405 रूपिया जगदलपुर ले रायपुर के टिकट 1270 रूपिया मात्र हे। आम नागरिक कम खरचा म आसानी ले हवाई यात्रा के लाभ ले सकत हें। हमर सरकार सुरु ले ही बस्तर के सर्वांगीण विकास बर कृत संकल्पित रहे हे। हम बस्तर के पहिचान अंतराष्ट्रीय स्तर म स्थापित करे बर बहुआयामी प्रयास करत हन।