बढि़या धान खरीदी व्यवस्था ले किसान मन म दिखिस खुशी

जगदलपुर, 05 जनवरी 2021। घाम-बरसात सहिके बड़ दुलार ले फसल के देखभाल करके बड़े करे अऊ लूये-मिसे के बाद ओला सही कीमत म बेचे के खुशी किसान मन के चेहरा म अलगेच दिखथे। फसल के सही कीमत मिले म धूप-बरसात म दिन-दिन भर करे मेहनत के भरपाई हो जाथे। ये कहना हे माड़पाल के किसान बलीराम के, जऊन 50 बोरा धान बेचे बर उपार्जन केन्द्र पहुंचे रहिस। वो ह कहिस के छत्तीसगढ़ शासन ले धान उत्पादक किसान अड़बड़ खुश हे। धान के सही कीमत देहे के संग किसान मन के सुविधा बर शासन कोति ले करे गए प्रयास घलोक दिखाई देवत हे। वो ह बताइस के धान खरीदी बर बारदाना उपलब्‍ध होए ले धान विक्रय म आसानी हो गए हे। माड़पालेच के उमाशंकर कुंवर ह घलोक माड़पाल उपार्जन केंद्र म 44.40 क्विटल मोटा धान के बेंचिस। किसान मन ह धान खरीदी बर करे गए प्रबंध बर प्रशासन ल सहरावत बताइन के धान खरीदी के व्यवस्था के जायजा लेहे बर सरलग उच्चाधिकारी घलोक इहां दउरा म आवत हें।
जिला प्रशासन कोति ले सबो उपार्जन केंद्र मन म बारदाना के उलब्धता सुनिश्चित कराए बर खाद्य विभाग के एक अधिकारी ल नोडल अधिकारी बनाए हे। जऊन रोजेच उपार्जन केंद्र मन म धान खरीदी चालू होए के पहिली बारदाना के जरूरत ल पूरा करवाए के काम करत हे। एखर अलावा जिला शहकारी बैंक, विपणन संघ कोति ले केंद्र ले धान खरीदी, उठाव के संगें-संग बारदाना के व्यवस्था के सरलग निगरानी करत हे।