जगार-2022 मेला : शिल्पकार मन ह करिन 88 लाख ले जादा के कारोबार

रायपुर, राजधानी रायपुर के छत्तीसगढ़ पंडरी हाट बाजार परिसर म आयोजित ‘‘जगार-2022’’ मेला म मनखे मन के भीड़ उमड़त हे। ये मेला के समापन आज सुकरवार 24 जून के होही। मेला म आए मनखे जमके खरीददारी करत हें। ये मेला म छत्तीसगढ़ संग 12 राज्य मन के शिल्पकार अऊ बुनकर मन के कई ठन उत्पाद के प्रदर्शन सह विक्रय बर 140 स्टॉल लगाए गए हे। शिल्पकार अऊ बुनकर मन के उत्पाद मन ल बेहतर प्रतिसाद मिलत हे। अब तक सिद्ध हस्तशिल्पकार अऊ बुनकर मन के तियार करे गए कई प्रकार के उत्पाद अऊ कलाकृति मन के करीबन 88 लाख रूपिया ले जादा के बिक्री होए हे। मनखे मन ले मिलत प्रतिसाद ल देखत ये मेला ल 24 जून तक 5 दिन बर बढ़ा दे गए रहिस।
जानबा हे कि मुख्यमंत्री श्री भूपेश बघेल ह 16 जून के मेला के अवलोकन के समय शिल्पकार अऊ कलाकार मन के उत्साहवर्धन करे रहिन। ये बेरा म शिल्पकार मन ह मुख्यमंत्री श्री बघेल ले 10 दिवसीय मेला के आयोजन ल अऊ बढ़ाए के आग्रह करे रहिन त उमन तुरंते सहमति देवत एला 5 दिन अऊ बढ़ाए के हुकुम अधिकारी मन ल देहे रहिन।
ये जगार मेला म छत्तीसगढ़ के अकतहा 12 राज्य मन के हस्तशिल्पकार मन ल अपन उत्पाद के प्रदर्शन-सह-विक्रय बर आए हें। ये बेरा म मेला परिसर म आये मनखे मन बर रोजेच संस्कृति विभाग कोति ले सांस्कृतिक कार्यक्रम के घलोक आयोजन करे जात हे। इही कड़ी म काली के सांस्कृतिक संध्या म दुर्ग जिला के उतई ले आए पारंपरिक लोक कलाकार मन ह शानदार प्रस्तुति दीन। कार्यक्रम के समय ‘चल संगवारी’ के 11 सदस्यीय लोक कलाकार मन ह मनमोहक प्रस्तुति दीन। जेन ल देखके मनखे मन नाचे ल मजबूर हो गे। ये मेला म बड़ संख्या म मनखे आके अपन मन-पसंद गृह सज्जा अऊ सजावटी जिनिस के संगें-संग पारंपरिक कुरथा के घलोक खरीददारी करके सांस्कृतिक संध्या के घलोक लुफ्त उठावत हें। जगार मेला म अब तक 88 लाख रूपिया ले जादा के बिक्री होए हे। ये मेला आम मनखे मन बर बिहनिया 11 बजे ले रात के 10 बजे तक खुले रइही।
जानबा हे कि जगार मेला म हस्तशिल्प के कई ठन उत्पाद के संगेच हाथकरघा, खादी ग्रामोद्योग, माटीकला के बहुत अकन आकर्षक उत्पाद मन के प्रदर्शनी बिक्री बर लगाए गए हे। ए स्टॉल मन म ले छत्तीसगढ़ बर कुल 80 स्टॉल आवंटित करे गए हे। उहें मध्यप्रदेश, उत्तर प्रदेश, आंध्र प्रदेश, तेलंगाना, बिहार, राजस्थान, पंजाब, हरियाणा, महाराष्ट्र, पश्चिम बंगाल, दिल्ली अऊ जम्मू अऊ कश्मीर के शिल्पकार 60 स्टॉल मन म अपन उत्पाद ल प्रदर्शित करत हें। जगार मेला-सह प्रदर्शनी म छत्तीसगढ़ राज्य के सुप्रसिद्ध हस्तशिल्प बेलमेटल शिल्प, लौह शिल्प, काष्ठ शिल्प, बांसशिल्प, कालीन शिल्प, शिसल शिल्प, गोदना शिल्प, तुमा शिल्प, टेराकोटा शिल्प, छिंद कांसा, हाथकरघा वस्त्र मन म कोसा के लुगरा, दुपट्टा, सलवार सूट, ड्रेस मटेरियल, बेडशीट, चादर अऊ कई प्रकार के रेडीमेंट वस्त्र के प्रदर्शन सह-विक्रय होवत हे। जगार मेला-2022 म उत्तर प्रदेश के लखनऊ के चिकनकरी, बनारस के बनारसी साड़ी, मध्यप्रदेश के चंदेरी, महेश्वरी अऊ टीकमगढ़ के ब्रांस, पश्चिम बंगाल के जूटवर्क, कांथावर्क अऊ बंगाली लुगरा के अकतहा पंजाब के फूलकारी, राजस्थान के मोजरी व गुजरात, दिल्ली, हरियाणा, महाराष्ट्र, बिहार अऊ जम्मू-कश्मीर संग कुल 12 राज्य मन के शिल्प कला मन के संग्रह देखे ल मिलत हे।