बिलासपुर, 19 सितंबर 2020। बिलासपुर वनमंडल के वन परिक्षेत्र बिटकुला के अंतर्गत दू वन्यप्राणी सियार (जेकाल) के अवैध शिकार के मामला म गिरफ्तार पांच आरोपी मगती, राजू, संदीप, महताब अउ मनीष शिकारी ल जेल भेज देहे गे हे। सियार के शिकार करत मउका म पकड़ाए पांचों आरोपी मन के पास ले दू नग बाईक समेत एक नग भरमार बंदूक घलो जब्त करे गे हे। जेल भेजे गे सबो आरोपी सीपत के तिर स्थित ग्राम मटियारी के रहइया हे।
अपर प्रधान मुख्य वनसंरक्षक (वन्यप्राणी) अरूण पाण्डेय ह बतइस कि 17 सितंबर के रात्रि वनमंडलाधिकारी बिलासपुर कुमार निशांत ल मुखबिर ले सूचना मिलिस कि वन परिक्षेत्र बिटकुला के अंतगर्त वन्यप्राणी के शिकार होय के आशंका हे। सूचना के तुरंत बाद वनमंडलाधिकारी निशांत के मार्गदर्शन म सोंठी वन परिक्षेत्र के सहायक वनपरिक्षेत्राधिकारी नमित तिवारी के नेतृत्व म वन विभाग के कर्मी मन के टीम द्वारा तत्काल मउका म घेराबंदी करके पांच आरोपी मन ल दो वन्यप्राणी सियार के शिकार करत पकड़े गिस। ये आरोपी मन के पास ले एक नग भरमार बंदूक, बारूद, छर्रा अउ 2 नग बाईक घलो जब्त करे गिस। इंखर विरुद्ध वन्यप्राणी संरक्षण अधिनियम के तहत वन अपराध प्रकरण पंजीबद्ध करके जेल भेजे के कार्रवाई करे गिस। ये उल्लेखनीय हे कि वन मंत्री मोहम्मद अकबर के निर्देशानुसार राज्य म वन विभाग द्वारा वन्यप्राणी मन के अवैध शिकार के रोकथाम सहित वन मन के सुरक्षा बर अभियान लगातार चलाये जावत हे। वन विभाग द्वारा वन अपराधी मन के विरूद्ध राज्य म लगातार होवत कार्रवाई ले भय व्याप्त हे।