किसान मन ह मानिन के खेत मन के जोताई अऊ रोपाई म होवत हे आसानी
मुख्यमंत्री ह गोधन न्याय योजना के प्रगति के करिन समीक्षा
गौ-मूत्र ले बेहतर क्वालिटी के कीटनाशक ब्रम्हास्त्र अऊ जीवामृत तियार करव
ब्रम्हास्त्र अऊ जीवामृत के उपयोग ल बढ़ावा देहे फसल प्रदर्शन के निर्देश
गोधन न्याय योजना के हितग्राही मन ल 5.60 करोड़ रूपिया के राशि जारी
रायपुर, मुख्यमंत्री श्री भूपेश बघेल ह काली मंझनिया मुख्यमंत्री निवास कार्यालय म गोधन न्याय योजना के अंतर्गत राशि अंतरण कार्यक्रम के मौका म कृषि, उद्यानिकी, पशुपालन विभाग के वरिष्ठ अधिकारी मन के बैठक लेके योजना के प्रगति के समीक्षा करिन। मुख्यमंत्री ह कहिन कि गौठान मन म गोबर ले बने वर्मी कम्पोस्ट के उपयोग के बेहतर परिणाम आगू आवत हे।
मुख्यमंत्री ह कहिन कि किसान मन ह माने हें कि जैविक खाद के उपयोग ले खेत के माटी मुलायम होवत हे। एखर से चालू खरीफ सीजन म खेत के जोताई अऊ धान के रोपाई म आसानी होवत हे। मुख्यमंत्री ह गौठान मन म बने जैविक खाद के गुणवत्ता ल बनाए रखे के संग अब गौ-मूत्र ले बेहतर क्वालिटी के कीटनाशक अऊ ग्रोथ प्रमोटर तियार करे के निर्देश दीन। मुख्यमंत्री ह कहिन कि गौ-मूत्र कीटनाशक ब्रम्हास्त्र अऊ ग्रोथ प्रमोटर जीवामृत ल किसान मन के बीच प्रमोट करे बर कृषि विभाग कोति ले फसल मन म एखर उपयोग के जगा-जगा प्रदर्शन घलोक सुनिश्चित करे जाना चाही।
मुख्यमंत्री श्री भूपेश बघेल ह ये मौका म गोधन न्याय योजना के हितग्राही मन ल 5 करोड़ 60 लाख रूपिया के राशि ऑनलाईन जारी करिन, जेमां गोबर विक्रेता मन ल 02 करोड़ 17 लाख रुपए, स्व सहायता समूह मन ल 01 करोड़ 37 लाख रुपिया अऊ गौठान समिति मन ल 02 करोड़ 07 लाख रुपिया के राशि सामिल हे। गोधन न्याय योजना के तहत अब तक कुल 311 करोड़ 94 लाख रूपिया के भुगतान करे जा चुके हे।
मुख्यमंत्री ह कहिन कि गोधन न्याय योजना देश-दुनिया के एकलौता अइसे योजना हे, जेमां 2 रूपिया किलो के दर ले गोबर अऊ 4 रूपिया लीटर के दर ले गौमूत्र के खरीदी करे जात हे। ये योजना म अभी तक 155 करोड़ 58 लाख रुपए के गोबर खरीदी होए हे। गौठान समिति अउ महिला स्व-सहायता समूह मन ल आज तक 156.36 करोड़ रुपिया के भुगतान करे गए हे। महिला समूह मन कोति ले 17 लाख क्विंटल वर्मी कम्पोस्ट, 5 लाख 19 हजार क्विंटल ले जादा सुपर कम्पोस्ट अउ 18 हजार 924 क्विंटल सुपर कम्पोस्ट प्लस खाद के निर्माण करे जा चुके हे। ये उत्पादित खाद ल सोसायटी मन के माध्यम ले शासन के कई विभाग अउ किसान मन ल रियायती दर म उपलब्ध कराए जात हे।
मुख्यमंत्री ह आगू कहिन कि राज्य म जैविक खेती ल बढ़ावा देहे ले जमीन के उर्वरा शक्ति बेहतर होही। खेती के लागत म कमी आही अऊ बेहतर क्वालिटी के विषरहित खाद्यान्न उपलब्ध होए ले मनखे मन के स्वास्थ्य अच्छा रहिही। उमन कहिन कि गोधन न्याय योजना के शुरुआत जेन लक्ष्य मन ल हासिल करे बर करे गए रहिस, वो सबो लक्ष्य बहुत कम समय म हासिल होए लगे हे। मुख्यमंत्री ह कहिन कि गोधन न्याय योजना छत्तीसगढ़ के गौरव बन गे हे। ये योजना के देशभर म सराहना होवत हे। अवइया समय म ये योजना ले अऊ जादा उपलब्धि हासिल होही।
ये बेरा म वन अउ जलवायु बदलाव मंत्री श्री मोहम्मद अकबर, मुख्यमंत्री के सलाहकार द्वय श्री प्रदीप शर्मा अउ श्री राजेश तिवारी, मुख्य सचिव श्री अमिताभ जैन, अपर मुख्य सचिव श्री सुब्रत साहू, गोधन न्याय मिशन के प्रबंध संचालक डॉ. अयाज तम्बोली, उद्यानिकी संचालक श्री माथेश्वरी व्ही., संचालक पशु चिकित्सा सेवाएं श्रीमती चंदन त्रिपाठी संग आन अधिकारी उपस्थित रहिन।
