- गौठान समिति मन के सक्रियता ले बाढ़त हे जैविक खाद के लोकप्रियता
- मुख्यमंत्री पहिली ट्रॉली म होए रहिस बिक्री, अब किलो के भाव म होवत हे बिक्री
- एक करोड़ 79 लाख रुपए के निर्माण काम मन के करिस लोकार्पण
रायपुर, मुख्यमंत्री श्री भूपेश बघेल ह आज दुर्ग जिला के ग्राम रसमड़ा म आयोजित लोकार्पण भूमिपूजन समारोह म एक करोड़ 79 लाख रूपिया के लागत के निर्माण काम मन के लोकार्पण करिस। मुख्यमंत्री ह कार्यक्रम ल सम्बोधित करत कहिन कि अपन धरती के उर्वरा शक्ति ल सहेजना हे, कृषि लागत ल कम करना हे त जैविक खेती ल अपनाना होही। उमन कहिन कि बहुत अकन क्षेत्र मन म दौरा करत गौठान मन के अवलोकन करत समय गौठान समिति के सदस्य मन अऊ कृषक मन ले मोर बात होत रहिथे। किसान मन ह बातचीत के समय मोला बताथें कि ओ मन वर्मी कम्पोस्ट बनाके बेचत हें अऊ एखर बाजार म अच्छा मांग हे। मुख्यमंत्री ह कहिन कि जिहां पहिली वर्मी कम्पोस्ट ट्राली म बिकत रहिस, अब किलो म घलोक बिके लगिस। उमन कहिन कि गौठान समिति मन ल मजबूत करे बर शासन हर महीना 10 हजार रुपए देवत हे।
मुख्यमंत्री ह ये बेरा म महात्मा गांधी ल सुरता करत कहिन कि गांधी जी सर्वजन हिताय सर्व जन सुखाय के बात करत रहिन। इही आदर्श छत्तीसगढ़ शासन ह अपन लिए रखे हे। हमन कृषि ऋण के कर्जमाफी करे के संगेच 2500 रुपए प्रति क्विंटल के दर ले धान खरीदी घलोक करेन। तेंदूपत्ता संग्राहक मन ल 4000 रुपए प्रति मानक बोरा संग्रहण मूल्य घलोक दे गीस। गांधी जी के सपना के भारत बनाए के दिशा म हम मन काम करत हन ताकि आखरी मनखे तक विकास के लाभ पहुंचय अऊ मेहनतकश ल ओखर श्रम के पूरा मूल्य मिल सकय।
गृह मंत्री श्री ताम्रध्वज साहू ह कहिन कि शासन कोति ले सबो वर्ग के हित बर योजना तियार करे गए हे अऊ इंकर क्रियान्वयन बर सरकार सरलग काम करत हे। सरकार कोति ले लेहे गए फैसला ले खेती किसानी के हालात घलोक सुधरे हे अऊ क्रय शक्ति बनेच हो गए हे। ये बेरा म मुख्यमंत्री ह सुपोषण किट अऊ सार्वभौम पीडीएस के अंतर्गत राशन कार्ड के वितरण घलोक करिस। ये बेरा म दुर्ग विधायक अरुण वोरा, गुंडरदेही विधायक श्री कुंवर सिंह निषाद, खुज्जी विधायक श्रीमती छन्नी साहू, जिला पंचायत अध्यक्ष श्रीमती माया बेलचंदन, सरपंच श्रीमती घुरवा बाई संग आन जनप्रतिनिधिगण उपस्थित रहिन।