जल जीवन मिशन 2.0 म पीए के पानी योजना मन ला पूरा करे बर लोक स्वास्थ्य यांत्रिकी विभाग ह बनाइस रोडमैप
उप मुख्यमंत्री श्री अरुण साव ह करिन लोक स्वास्थ्य यांत्रिकी विभाग के काम-बूता के समीक्षा
अधिकारी मन ला तय लक्ष्य के मुताबिक समय-सीमा म योजना मन ला पूरा करे के निर्देश
तय होही जवाबदेही, लापरवाही अउ ढील-ढाल करे ऊपर होही कारवाही
रायपुर, उप मुख्यमंत्री अउ लोक स्वास्थ्य यांत्रिकी मंत्री श्री अरुण साव ह काली लोक स्वास्थ्य यांत्रिकी विभाग के काम-बूता के समीक्षा करिन। ओमन ह मंत्रालय म बड़े विभागीय अधिकारी मन अउ मैदानी अधिकारी मन के बैठक लेके जल जीवन मिशन के काम मन, नक्सल प्रभावित रहे इलाका मन के पीए के पानी योजना मन अउ प्रदेश म घाम के दीन म पानी के ब्यवस्था के समीक्षा करिन। राज्य के जम्मो जिला के अधिकारी मन वीडियो कॉन्फ्रेंसिंग ले बैठक म सामिल होइन। लोक स्वास्थ्य यांत्रिकी विभाग के सचिव अउ जल जीवन मिशन के संचालक श्री मोहम्मद कैसर अब्दुलहक अउ प्रमुख अभियंता श्री के.के. मरकाम घलो बैठक म बिराजमान रहिन।
उप मुख्यमंत्री श्री अरुण साव ह जल जीवन मिशन के काम मन ला पहिली प्राथमिकता ले पूरा करे बर आघू के दू साल के रोडमैप ऊपर गोठ-बात करत अधिकारी मन ला मिशन के बचे काम मन ला संजीदगी, सक्रियता अउ तेजी ले पूरा करे के निर्देश दीन। ओमन ह कहिन के मैदानी स्तर ऊपर काम के गति अउ ओकर पूरा होए ले ही केंद्र सरकार अउ राज्य्य सरकार कोती ले काम मन बर पइसा जारी करे जाही। जल जीवन मिशन के बांचे काम मन ला अऊ जादा धियान अउ बारीकी ले करना हे। ओमन ह कहिन के अभी के बखत म पीए के पानी के आपूर्ति जादा करके सरकारी ब्यवस्था ऊपर ही आस्रित हे। पानी आपूर्ति के कम ब्यवस्था या एमा कोनो किसम के बाधा आय ले लोगन मन ला बड़ दुख-तकलीफ के सामना करना परथे। एकर बर विभाग ला दूरिहा के सोच अउ पहिली ले अनुमान लगाके काम करे के जरूरत हे।