जल जीवन मिशन ले घर म लगिस नल, पानी बर रोज होवइया टेंशन ले मिलीस मुक्ति
कोरबा, 8 सितमबर 2024। पहाड़ी कोरवा हीरा बाई ल वो दिन आज घलोक बने सहिन सुरता हे जब एक मटका पानी बर ओला घर ले दूर जंगल कोति दुरिहा जाना परय। पानी बर हलाकानी बने रहय। वो अपन किस्मत ल कोसत जंगल के भितरी नाला म जावय अऊ उहाँ ले पानी लाके घर के जरूरी काम निपटावय। एक दिन ओखर गाँव म पक्की सड़क घलोक बन गे, फेर पानी तभो दूर के कौड़ी रहिस। वो अपन छोटे लइका मन ल लेके नाला जावय अऊ उही खतरा के बीच उमन ल नहुवावय। अब जबकि घर तीर ही सोलर ड्यूल पम्प लग गए हे अऊ घरे म ही नल के कनेक्शन मिल गए हे, त पहाड़ी कोरवा हीरा बाई बहुत खुश हे। वो कहिथे के नल कनेक्शन लगे अऊ पानी घर म आए ले ओला नाला जाना नइ परत हे। घरे म ही नल के धार ले पानी मिल जात हे। अब रोज पानी ल लेके होवइया टेंशन दूर हो गए हे।
कोरबा जिला के विकासखंड कोरबा के ग्राम कोराई म रहइया पहाड़ी कोरवा हीरा बाई के बड़का परिवार हे। कइ बछर ले ओ मन सबो जंगल के करीब रहत आए हे। लंबा समय ले नरवा के पानी पीयत आए हें। अब इमन ल अपन घर तीर सोलर ड्यूल पम्प के माध्यम ले नल लग जाय ले बहुत राहत मिले हे। पहाड़ी कोरवा हीरा बाई ह बताइस कि घर के सबो सदस्य अब घर के नल के ही पानी पीथें। घर म रोजमर्रा के आन छोटे-मोटे जरूरत बर घलोक पानी उपयोग म आथे।
