श्रीमती सुकली बाई के सिरा गे पानी के पीरा, घर मा ही मिले लगिस सुद्ध पिये के पानी
कबीरधाम, जल जीवन मिशन आज गांव वाले मन बर बहुत बड़ राहत बन गे हे। ये योजना ले अब गांव के परिवार मन ला ओकर घर मा ही सफा अउ सुरक्षित पिये के पानी मिले लगे हे। एकर ले कइ बछर ले चलत आत पानी के समस्या ले लोगन मन ला हमेशा बर छुटकारा मिल गे हे। रोज सुद्ध पानी मिले ले गांव वाले मन के जीवन अब पहली ले ज्यादा आसान अउ सुरक्षित हो गे हे।
पहली गांव मन मा पानी बर लोगन ला दूरिहा-दूरिहा तक जाय ला परत रहिस। खास करके महिला मन ला रोज कतको किलोमीटर पैदल चलके पानी लाय ला परत रहिस। एकर से ओमन के समय, मेहनत अउ सेहत तीनों ख़राब होवत रहिस। पानी के कमी के सेती रांधे-गढ़े, साफ़-सफाई अउ मवेशी मन के देखभाल जइसे काम मा घलोक भारी दिक्कत होवत रहिस। पानी हमर जीवन के सबले जरुरी चीज हरय। बिहनिया ले रतिहा तक हर काम मा पानी लगथे। पानी के बिना जीवन के कल्पना घलोक नइ करे जा सकय। इही जरुरत ला समझत सरकार ह “हर घर जल” के लक्ष्य के संग जल जीवन मिशन सुरु करिस, ताकि गांव-गांव तक पिये के पानी पहुंचाए जा सकय।
इही योजना के लाभ लेवैया कबीरधाम जिला के पंडरिया विकासखंड के ग्राम पंचायत खाम्ही के आश्रित ग्राम रोखनी के रहवइया श्रीमती सुकली बाई बताथे के उमर बढ़े के सेती ओकर बर दूरिहा ले पानी लाना भारी मुश्किल हो गे रहिस। नहाय, रांधे अउ मवेशी मन बर पानी जुटाना घलोक बड़का समस्या रहिस। घर मा पानी नइ होय ले रोज के सबो काम मा बाधा परत रहिस। उन बताइन के जल जीवन मिशन के तहत घर मा नल कनेक्शन मिले के बाद अब ओमन ला पानी बर कहुँ जाय ला नइ परय। घर मा ही पर्याप्त मात्रा मा सफा पानी मिलत हे, जेकर ले उंकर जीवन अब पहली ले कहूं ज्यादा आसान अउ सुरक्षित हो गे हे।
श्रीमती सुकली बाई ह जल जीवन मिशन के माध्यम ले घर तक सुद्ध पिये के पानी के सुविधा देहे बर सरकार के प्रति आभार जतात धन्यवाद दीहिन। आज ये योजना के जरिए जिला के लाखों घर मन मा नल ले पानी पहुंचत हे। एकर ले लोगन के सेहत मा सुधार होय हे, समय के बचत होवत हे अउ जीवन स्तर घलोक बढ़िया होय हे। ये योजना गांव के विकास के दिसा मा एक ठन बहुत ही सराहनीय कदम हे।