40 किलो लीटर के ऊँचा जलागार अउ 140 नल कनेक्शन ले घर-घर पहुँचत हे साफ पानी
महासमुंद, छत्तीसगढ़ मा गाँव के आखिरी कोना तक हर घर नल ले पानी पहुँचाए के सपना ला जल जीवन मिशन ह पूरा करत हे। महासमुंद जिला के आखिरी छोर मा ओडिशा सीमा ले लगे ग्राम पंचायत टेड़ीनारा के सोहागपुर मा मिशन के तहत करे गे काम ले अब हर घर नल ले पानी पहुँचत हे। लोक स्वास्थ्य यांत्रिकी विभाग ह इहाँ साफ अउ सुरक्षित पानी के सुबिधा बर 54 लाख 38 हजार रूपया के खरचा ले 40 किलो लीटर के एक ठन ऊँचा जलागार बनाए हे। गाँव मा 2800 मीटर पाइपलाइन बिछाके अउ 140 घरेलू नल कनेक्शन देके हर घर सुद्ध पानी पहुँचाए के लक्छ ला पूरा करे गए हे। सोहागपुर ला बीते दिसम्बर महीना मा ‘हर घर जल’ गाँव घोसित करे गए हे।
पीए के पानी बर पहिली सोहागपुर के मनखे मन हैंडपंप, पावर पंप अउ कुआँ ऊपर भरोसा देवत रहिन। बरसात के दिन मा माई लोगन मन ला दूरिहा ले पानी लाय मा बहुत तकलीफ होत रहिस। अब घर तक पानी पहुँचे ले महिला मन के समय बांचत हे। एखर ले ओमन अपन रोजी-रोटी के काम, लइका मन अउ घर-परिवार ला जादा बखत देहे पात हें। घर के सबो झन बर रोज-रोज पानी के इंतजाम करे मा होइया हैरानी-परेशानी ले घलो ओमन ला छुटकारा मिल गे हे।
