घर-घर पहुँचत हे पानी, बदल गे ठरकपुर के कहानी

हर घर नल, हर घर जल के सपना होइस साकार

मुंगेली, जल जीवन मिशन ले मुंगेली जिला मुख्यालय ले 25 किलोमीटर दूर बसे गाँव ठरकपुर मं ‘हर घर नल, हर घर जल’ के सपना पूरा हो गे हे। ए मिशन के तहत ठरकपुर मं पाइपलाइन बिछा के जम्मो घर म नल के कनेक्शन देहे गे हे। एखर बाद ले गाँव म न केवल पीए के पानी मिले के भरोसा जागे हे, बल्कि पानी के सुद्धता अउ नियम घलो बने हो गे हे। अब गाँव के हर घर म साफ पानी पहुँचत हे। एखर ले ठरकपुर के कहानी ह बदल गे हे।
कभू पानी के किल्लत ले जुझइया ठरकपुर के तस्वीर आज पूरा बदल गे हे। एक समय रहिस जब पानी बर हैंडपंप म लंबा लाइन लगय, मटका अउ बाल्टी धर के मनखे मन के भीड़ रहय अउ गरमी के दिन म गाँव म पानी के भारी आफत होवय। पहिली पूरा गाँव पानी बर सिरिफ 8 ठन हैंडपंप के भरोसा म रहिस। गरमी म जब वाटर लेवल गिर जाय त हैंडपंप ह जवाब दे दय, जेखर ले गाँव के लोगन मन ला, खास करके माई लोगन मन ला दूर-दूर ले पानी बोह के लाय बर मजबूर होना परय।
ठरकपुर के श्रीमती गंगा यादव ह बताथे के पहिली छोटे लइका मन ला घर म छोड़ के दूरिहा हैंडपंप ले पानी लाय बर जाय लगय। गरमी म बहुत दुख होवय। अब घर म नल लग गे हे, भरपेट पानी मिलत हे अउ जिनगी ह असान हो गे हे। नल जल योजना ले महिला मन के मेहनत अउ समय बांचत हे, जेला अब ओमन अपन परिवार, लइका मन के देखरेख अउ दूसर काम मन म लगा पावत हें, एखर ले ओ मन के चेहरा म मुस्कान आए हे। ठरकपुर म जल जीवन मिशन ह सिरिफ पानी के इंतजाम नइ करे हे, बल्कि उहां ये उदीम ले सेहत, सुबिधा अउ सम्मान के जरिया बनके आए हे। साफ पानी पिये ले बिमारी मन मं कमी आए हे अउ ग्रामीण मन के जिनगी के स्तर ह सुधर गे हे।