जल जीवन मिशन: ठकुरीकापा के गॉंव वाले मन ला पानी के संकट ले मिलिस राहत

मुंगेली, कभू पानी के दुख-तकलीफ ले जूझइया ग्राम पंचायत ठकुरीकापा ह आज जल जीवन मिशन के बदौलत खुसी अउ राहत के नवा मिसाल बनगे हे। मुंगेली जिला ले लगभग 25 किलोमीटर दूरिहा स्थित ए गॉंव म अब हर घर तक नल के सुविधा ले रोज नियम से पीए के पानी पहुंचत हे। एकर ले कइ बछर जुन्ना पानी के तकलीफ ह सिरा गे हे अउ गॉंव वाले मन के चहेरा म संतोस साफ दिखत हे। लगभग 02 हजार 285 के आबादी वाले गॉंव ठकुरीकापा म पहिली पीए के पानी बर 17 हैंडपंप अउ पावर पंप मन ऊपर आस्रित रहना परत रहिस। नेशनल रूरल ड्रिंकिंग वाटर प्रोग्राम योजना के तहत पानी टंकी अउ पाइपलाइन के ब्यवस्था होए के बाद घलो पूरा पानी नइ मिल पावत रहिस। घाम के दीन म स्थिति ह आऊ जादा गम्भीर हो जावत रहिस, जब हैंडपंप मन के पानी स्तर नीचे चले जात रहिस अउ कइ हैंडपंप ह सूख जात रहिस, जेकर ले माइलोगन मन ला बड़ दूरिहा ले पानी लाय बर परत रहिस।
लोक स्वास्थ्य यांत्रिकी विभाग के कार्यपालन अभियंता ह बताइस के गॉंव वाले मन के दुख-तकलीफ ला देखत सासन कोती ले जल जीवन मिशन के तहत गॉंव म नवा पाइपलाइन बिछाके घर-घर नल कनेक्शन देहे गीस। अब हर एक घर म नियम ले साफ-सुथरा पीए के पानी मिलत हे, जेकर ले गॉंव वाले मन ला बड़ राहत मिले हे। गॉंव के माइलोगन मन ह बताइन के पहिली पानी लाय म कइ घंटा लग जावत रहिस, फेर अब घर म ही नल ले पानी मिले लगे हे। एकर ले समय के बचत होए के संगे-संग रोज के जिनगी घलो सुघर होगे हे। लइका मन के पढ़ाई अउ घर के काम-बूता ऊपर घलो सुघर असर परे हे। गॉंव वाले मन ह ए बड़ जरूरी योजना बर देस के प्रधानमंत्री श्री नरेन्द्र मोदी अउ मुख्यमंत्री श्री विष्णुदेव साय के प्रति आभार जतावत कहिन के जल जीवन मिशन ह गॉंव के दसा ला बदल देहे हे। जिला प्रशासन अउ लोक स्वास्थ्य यांत्रिकी विभाग के सरलग देख-रेख अउ कोसिम ले अब गॉंव म साफ पीए के पानी के पक्का ब्यवस्था होगे हे।