जल जीवन मिशन के काम मन के गुणवत्ता म ध्यान देवव : मुख्यमंत्री श्री भूपेश बघेल

शिवरीनारायण, मुख्यमंत्री श्री भूपेश बघेल ह आज भेंट मुलाकात के समय शिवरीनारायण म अधिकारी मन के समीक्षा बैठक म कहिन कि जल जीवन मिशन के अंतर्गत संचालित पेयजल योजना मन के काम मन के गुणवत्ता म सुधार करे के जरूरत हे। ये क्षेत्र के कुछ गांव मन ले शिकायत आए हे। एकर समाधान होना चाही। अंचल के कुछ गांव मन म डूबान क्षेत्र मन के किसान मन ल मुआवजा राशि अभी तक नइ मिल सके ये। उमन कलेक्टर ल पहल करके किसान मन ल राशि देवाए ल कहिन। श्री बघेल ह सिंचाई परियोजना के अंतर्गत टेल एरिया के खेत मन तक पानी पहुंचाए के ठोस कार्ययोजना बनाए के निर्देश दीन। मुख्यमंत्री श्री बघेल ह कहिन के शासकीय जमीन म अतिक्रमण के कार्रवाई गांव वाले मन के सहमति ले करे जाए। यथासंभव बल के परयोग नइ करे जाना चाही, समझाए ले मनखे समझ जाहीं।
मुख्यमंत्री ह ये घलोक कहिन कि शासन के छोट छोट अनुदान राशि गरीब मन बर महत्वपूर्ण हे। एला प्राप्त करे बर ओ मन ल दफ्तर के घेरी-बेरी चक्कर लगाय के जरूरत नइ परना चाही। एकर विशेष रूप ले ध्यान रखे जाय।
मुख्यमंत्री श्री बघेल ह कहिन कि शासन कोति ले करे गए घोषणा मन ल प्राथमिकता ले अऊ समय सीमा म पूरा करव। एला लागू करे अउ अमल म लाय म देरी नइ होए चाही। उमन कहिन कि धान कटाई के मौसम शुरू होवइया हे। बड़ मात्रा म पैरा खेत म रहिही। एला गौठान ल दान करे बर किसान मन ल प्रोत्साहित करे जाए। ये संबंध म जनजागरुकता के कार्यक्रम करे जाए। मुख्यमंत्री ह आगू कहिन कि प्रशासन ल अब स्वावलंबी गौठान के अलावा नवा गौठान मन म घलोक ध्यान देना चाही। श्री बघेल ह कहिन कि इहां ले अड़बड़ झन बाहिर काम बर जाथें। कहूं गौठान अऊ रीपा गतिविधि बने सहिन संचालित होही, त पलायन थमही, ओ मन ल अपन घर के आसपास ही काम मिलही।
मुख्यमंत्री ह कहिन कि शिवरीनारायण राज्य के प्रमुख धार्मिक व ऐतिहासिक पर्यटन स्थल ये। इहां अवइया पर्यटक मन के सुविधा बर सरकार बहुत सुविधा विकसित करत हे। मुख्यमंत्री ह ग्रामीण के संगे संग शहरी इलाका मन के सड़क मन के मरम्मत बर अभियान चलाय ल कहिन। उमन अवैध शराब, जुआ सट्टा, नशीली दवइ के विरुद्ध सख्त कार्रवाई के निर्देश दीन। श्री बघेल ह बैठक म स्कूल शिक्षा गुणवत्ता बढ़ाय म विशेष जोर दीन। न केवल शिक्षा विभाग बल्कि आन अफसर घलोक दौरा म स्कूल मन के निरीक्षण करव। स्‍वामी आत्मानन्द स्कूल मन के संग आन स्कूल मन के गुणवत्ता म समान रूप ले ध्यान देना हे।
ये बेरा म कमिश्नर डॉ संजय अलंग, आईजी रतनलाल डांगी, मुख्यमंत्री के सचिव श्री अंकित आनंद, प्रभारी सचिव श्री धनंजय देवांगन, कलेक्टर तारण प्रकाश सिन्हा, एसपी विजय अग्रवाल, जिला पंचायत सीईओ फरिहा आलम सिद्धिकी संग जिला व ब्लॉक स्तरीय अधिकारी बैठक म उपस्थित रहिन।