जल जीवन मिशन : बस्तर के बेसरापाल के 111 परिवार ला मिलिस शुद्ध पेयजल

जगदलपुर, जल जीवन मिशन के तहत बस्तर जिला के ग्राम पंचायत सेमलनार के आश्रित गांव बेसरापाल म ‘हर घर नल से जल’ के संकल्प साकार हो गे हे। तीन वार्ड म बसे ए गांव के जम्‍मो 111 परिवार मन के घर तक नल के माध्यम से शुद्ध पेयजल पहुंचे ले गांव वाले मन ला पानी की समस्या ले राहत मिले हे। नियमित जलापूर्ति बर गांव म 40 हजार लीटर क्षमता के पानी टंकी बनाए गए हे, अउ पंप ऑपरेटर रमेश मौर्य व्यवस्था संभालत हे। गांव के घर मन के संग दूनो आंगनबाड़ी केंद्र ला घलो नल कनेक्शन ले जोड़े गए हे, जेकर से लइका मन बर स्वच्छ पानी मिलना सुनिश्चित हो गे हे। बेसरापाल म पानी के गुणवत्ता के निगरानी बर महिला मन ला जिम्मेदारी देहे गए हे। गांव के कृमिटकी कश्यप, उर्मिला कश्यप अउ सुमनी मौर्य फील्ड टेस्ट किट के माध्यम ले पानी के नमूना के जांच करथें। ग्राम सरपंच श्रीमती उर्मिला कश्यप ह प्रसन्नता जतावत कहिन के अब ग्रामीण मन ला पानी बर दूर नई जाना परत हे अउ घरे म साफ पानी मिलत हे, जेकर से खासकर महिला मन ला बहुत राहत मिले हे। प्रधानमंत्री नरेंद्र मोदी के नेतृत्व म चलत ए योजना ले ग्रामीण जीवन आसान अउ बेहतर होत हे।