जल जीवन मिशन ह दीस आत्मनिर्भरता के अमृत
मनेन्द्रगढ़-चिरमिरी- भरतपुर, मुख्यमंत्री श्री विष्णुदेव साय के मंशा के मुताबिक केंद्र अउ राज्य सरकार के सबो योजना मन के उचित क्रियान्वयन कर आमजन ल समय म लाभ पहुंचाए जात हे। आखरी लकीर म खड़े मनखे ल लाभ पहुंचाके जनकल्याण सुनिश्चित करे जात हे। छत्तीसगढ़ के आदिवासी बहुल जिला मनेन्द्रगढ़-चिरमिरी- भरतपुर के विकासखंड मनेंद्रगढ़ स्थित ग्राम पंचायत पाराडोल के गृहिणी श्याम बाई के कहानी अब बदलाव, आत्मनिर्भरता अऊ सामाजिक जागरूकता के मिसाल बन गे हे। कभू पानी बर दूरिहा तक जवइया श्याम बाई आज पूरा गांव म प्रेरणा के चिनहारी बन गए हे।
श्याम बाई ल पानी बर रोजेच एक किलोमीटर जाए ल परत रहिस
कई बछर ले जल संकट के मार झेलत श्याम बाई न केवल अपन परिवार के पालन-पोषण करत रहिन, बल्कि बिहनिया-बिहनिया एक किलोमीटर दूरिहा ले पानी डोहरई वोखर दिनचर्या बन गए रहिस। गर्मी के दिन म कुंवा के सूखा जाए ले, सार्वजनिक नल बर अउ दुरिहा जाए ल परत रहिस। दिन के अधिकांश समय केवल पानी डोहारेच म चल देत रहिस। जेखर चलते वोखर सेहत म उलटा असर परत रहिस अऊ अपन लइका मन ल घलोक वो जादा समय नइ दे पात रहिस।
जब उम्मीद ल मिलीस सहारा, गांव आइस जल जीवन मिशन
श्याम बाई के जीवन तब बदलिस जब केंद्र सरकार के महत्वाकांक्षी योजना “जल जीवन मिशन” के प्रभावशाली क्रियान्वयन छत्तीसगढ़ सरकार कोति ले करे गीस। लोक स्वास्थ्य यांत्रिकी विभाग के मेहनत, ग्राम पंचायत के सक्रिय भूमिका अऊ स्थानीय जनप्रतिनिधि मन के सहयोग ले ग्राम पाराडोल म घर-घर नल कनेक्शन पहुंचाए गीस। अब हर घर म स्वच्छ, सुरक्षित अऊ भरपूर मात्रा म पीए के पानी मिलत हे।