कलेक्टर ह कोसारटेडा जल प्रदाय योजना म देरी के सेति ठेकादार ल दीस नोटिस

कोण्डागांव, 29 मई 2021 शनिच्चर। शुक्रवार के कलेक्टर पुष्पेन्द्र कुमार मीणा कोति ले कोण्डागांव नगर म पेयजल आपूर्ति बर बनाए आवर्धन जल प्रदाय योजना के वर्चुअल बइठका म समीक्षा करीन।
केन्द्र सरकार के प्रवर्तित आवर्धन जल प्रदाय योजनांतर्गत कोसारटेडा डैम ले कोण्डागांव नगर बर पेयजल आपूर्ति योजना तियार करे रिहिसे। 47 करोड़ 47 लाख के लागत ले बनइया ये योजना के टेण्डर अउ कार्यादेश बछर 2019 तक पूरा होगे रिहिसे। ये कार्ययोजना बर प्लानिंग, निर्माण अउ संचालन प्रारंभ बर निर्माण करइया कम्पनी ल 36 महीना के समे देहे रिहिने। एकर बर निर्धारित 24 महीना के समयावधि गुजरे के बाद तको मैदानी स्तर म काम चालू नइ हो पाए म कलेक्टर ह समीक्षा बइठका म ठेकेदार ले देरी के कारण पूछीस। संतोषजनक जुवाब नइ देहे म कलेक्टर ह ठेकादार के विरूद्ध नोटिस जारी करके बूता ल लउहे पूरा करे बर हुकुम देहे। संग म मुख्य नगरपालिका अधिकारी ल संबंधित फर्म के विरूद्ध अलग से कार्यवाही करत एकर सूचना संचालनालय, नगरीय प्रशासन अउ विकास विभाग ल भेजे बर कहेे हे।
कलेक्टर ह ठेकेदार ल अवइया 15 महीना म काम पूरा करेे के निर्देश देवत नगरपालिका सीएमओ ल योजना के निरीक्षण करके प्रगति के संबंध म अवगत कराए बर काहत एहू कहे हे कि कहूं निर्माण म संबंधित निर्माणकर्ता कम्पनी ह फेर देरी करही त कम्पनी के टेण्डर निरस्त करके ओकर उपर जुर्माना तको लगाय जाय।