- राज्यपाल ह भारतीय कृषि अर्थशास्त्र सोसायटी के 79वां सम्मेलन के करिन शुभारंभ
- कृषि उत्पादन म वृद्धि अऊ सिंचाई सुविधा मन म विस्तार बर शासन दृढ़संकल्पित – कृषि मंत्री श्री चौबे
रायपुर, राज्यपाल सुश्री अनुसुईया उइके ह आज इंदिरा गांधी कृषि विश्वविद्यालय रायपुर के सभागृह म आयोजित भारतीय कृषि अर्थशास्त्र सोसायटी के 79वां तीन दिवसीय सम्मेलन के शुभारंभ करिन। उमन मुख्य अतिथि के आसंदी ले संबोधित करत कहिन कि कृषि वैज्ञानिक मन जलवायु म होवत बदलाव ल देखत खेती ल लाभ के धंधा बनाए बर हरसंभव उदीम करव। उमन कहिन कि खेती म एकदम नवा कृषि तकनीक, मशीनरी अऊ उन्नत बीज के उपयोग करे बर किसान मन ल प्रेरित करे जाना चाही अऊ संगेच ये घलोक उदीम करे जाए कि किसान मन ल कृषि मशीनरी रियायती दर म या आन कोनो तरीके ले उपलब्ध कराए के व्यवस्था होजाए।
कृषि अऊ जल संसाधन मंत्री श्री रविन्द्र चौबे ह कहिन कि ये खुशी के बात हे कि कृषि के आर्थिक पहलु उपर आधारित अइसन सेमिनार छत्तीसगढ़ म आयोजित करे जात हे। छत्तीसगढ़ ल धान के कटोरा कहे जाथे। राज्य शासन कोति ले सिंचाई के क्षेत्र म कई ठन योजना क्रियान्वित करे जात हे, एखर से प्रदेश म सिंचाई के विस्तार घलोक होही। एखर फलस्वरूप धान के उत्पादन ल दुगुना होए के संभावना हे। ए परिस्थिति मन म हमर किसान बाजार म खुद ल कऊन प्रकार सुरक्षित रख पाही अऊ ओखर अच्छा भविष्य ल लेके का संभावना होही।