रइपुर, 16 जून 2021 बुधवार। मुख्यमंत्री दाउ भूपेश बघेल ह कहीन कि आम लोगन तक स्वास्थ्य अउ चिकित्सा सुविधा आसानी ले पहुंचाए बर प्रदेश के सबो जिला चिकित्सालय अउ विकासखण्ड स्तरीय अस्पताल मन ल सर्वसुविधा संपन्न बनाये जावत हे। उन मन एकर बर जम्मो जिला कलेक्टर मन के माध्यम ले 15 दिन के भीतर कार्ययोजना तियार करे के निर्देश मुख्य सचिव ल देहे हे।
मुख्यमंत्री ह कहीन कि पीछू 6 महीना म कोरोना के पोठ इलाज बर अस्पताल मन म आक्सीजन संबंधी उपकरण आई.सी.यू. बिस्तर, वेन्टिलेटर्स मन के संख्या म उल्लेखनीय बढ़ौतरी होय हे। ये सब कोरोना के तीसरइया लहर के तियारी बर तको आवश्यक हे। सामुदायिक स्वास्थ्य केन्द्र मन म डाक्टर मन के संख्या बाढ़े हे, फेर स्वास्थ्य प्रबंधन अउ पोठ करना आवश्यक हे।
दाउ बघेल ह कहीन कि प्रदेश के सबो जिला चिकित्सालय अउ सामुदायिक स्वास्थ्य केन्द्र मन के विकास के एक योजना लउहे तियार करे जाय। ये योजना म उपरोक्त सबो अस्पताल मन म सर्व सुविधा संपन्न ऑपरेशन रूम, लेबर रूम, लैबोरेटरी, आई.सी.यू. और वेन्टीलेटर के सुविधा, ब्लड बैंक, फोकट म दवा आदि सुविधा उपलब्ध कराए के बेवस्था करे जाय । 24 घंटा इलाज के सुविधा होवय। शिशु रोग, स्त्री रोग, निश्चेतना, पैथॉलाजी, मेडिसीन अउ सर्जरी के पोस्ट ग्रेजुएट चिकित्सक उपलब्ध कराए के उदीम करे जाय अउ जिंहा पोस्ट ग्रेजुएट उपलब्ध नइ हो सकैं, उहां वो विषय मन म प्रशिक्षण पाए चिकित्सक मन के बेवस्था करे जाय । मुख्यमंत्री ह कलेक्टर मन के माध्यम ले अइसन प्रस्ताव, आवश्यक बजट सहित 15 दिन म प्रस्तुत करे के निर्देश देहे हे।