रायपुर, 8 अगस्त 2024। मुख्यमंत्री श्री विष्णु देव साय ह निवास परिसर म आयोजित जनदर्शन म आए दिव्यांग श्री रूपेश कुमार साहू ल शिक्षण, प्रशिक्षण अऊ व्यवसाय बर 50 हज़ार रूपिया आर्थिक सहायता राशि देहे के घोषणा करिन। ए घोषणा ले रूपेश के खुशी के ठिकाना नइ रहिस। वो ह कहिस के जीवन म अवइया संकट ल हँसत सामना करना अब वोखर दिनचर्या म सामिल हे। भानसोज निवासी दिव्यांग रूपेश कुमार साहू कठिनाई के हँसत सामना करके अपन दू भाइ मन के संगे-संग अपन परिवार ल आर्थिक रूप ले मजबूत करे म भूमिका निभावत हे। ऑटोपार्ट्स दुकान के संचालन करके एक बेहतर भविष्य के निर्माण करे म वो ह लगे हे।
दिव्यांग रूपेश साहू भूमिहीन परिवार ले हे। वोखर पिता श्री पुष्कर साहू मजदूरी करके अपन परिवार के भरण-पोषण करथे। साल 2018 म रूपेश के मां के मृत्यु होए म लइका मन के पालन पोषण के जिम्मेदारी पिता उपर आ गइस। रूपेश दिव्यांग होए के सेती ऊंखर पालन पोषण म परेशानी के सामना करना परिस। दिव्यांग रूपेश पढ़ाई म बेहतर रहिस, वो ह बी. ए. के परीक्षा उत्तीर्ण करिस। अपन दिव्यांगता ल कमजोरी नइ मानके ओ हर अपन हौसला ल कभू टूटे नइ दीस। वो ह अपन परिवार के आर्थिक स्थिति ल सुधारे के हर संभव प्रयास करिस। अभी हाल म ओ ह ग्राम कोसरंगी म अपन दू भाइ मन के संग ऑटोपार्ट्स दुकान के संचालन करत हे।
जनदर्शन कार्यक्रम म पहुंचे दिव्यांग रूपेश के दास्तान सुनके मुख्यमंत्री श्री विष्णुदेव साय ह ओ ल 50 हज़ार रुपिया के आर्थिक सहायता प्रदान करे के स्वीकृति दीस। मुख्यमंत्री श्री साय के हाथ मिले आर्थिक मदद ह रूपेश के जीवन म एक नवा उम्मीद के किरण जगाए हे। अब ओ अपन व्यवसाय ल अऊ सुग्घर तरीका ले कर सकही अऊ अपन संग भाई मन के भविष्य ल सुरक्षित कर सकही।
