रायपुर, राष्ट्रपिता महात्मा गांधी के 150 वीं जयंती के अवसर म ’गांधी विचार पदयात्रा’ म कंडेल पहुंचे प्रदेश के मुख्यमंत्री श्री भूपेश बघेल ह आज गौरव ग्राम कण्डेल म जनसहयोग ले बने प्रदेश के पहिली गौठान ’गोकुलधाम गौठान’ के लोकार्पण करिन। ए दौरान उमन गाय के पूजा अर्चना करके घास घलोक खवाइन अऊ गौठान के निरीक्षण घलोक करिन। मुख्यमंत्री ह गाँव के मनखे मन कोति ले जनसहभागिता ले बनाये गए गौठान के प्रशंसा करिन। शासन के महत्ती सुराजी गांव योजना के तहत् गांव वाले मन ह गौठान समिति गठित करके चार एकड़ के क्षेत्र म गौठान बनाए हें। गौठान बनाइया गाँव वाले मन ह पांच लाख रूपिया चंदा करके राशि घलोक जुटाए हें। इहां के मनखे मन ह श्रमदान करके अहाता निर्माण, गौठान समतलीकरण अऊ साफ-सफाई कर गौठान म अपन सहभागिता देवत हें।
ए गौठान म कम लागत म सुव्यवस्थित ढंग ले पांच-पांच नाडेप अऊ केंचुआ खाद टंकी के निर्माण घलोक करे गए हे। पशु मन के पेयजल के व्यवस्था बर 04 कोटना अउर पांच हजार लीटर क्षमता वाले पानी टंकी ले पाईप लाईन के विस्तार, नंदी चबूतरा, पैरा संग्रहण बर मचान के संग ही पशु मन के छइंहा बर शेड के निर्माण करे गए हे। दू-दू घन मीटर के क्षमता वाले दू बायोगैस संयंत्र इहां स्थापित करे हे। एखर जरिए दो चरवाहा परिवार मन ल गैस के सप्लाई करे जात हे।
इहां पशुधन विकास विभाग कोति ले कृत्रिम गर्भाधान ले उत्पादित बछड़ा मन के प्रदर्शनी तको लगाए गीस। ए दौरान कृषि अउर जैव प्रौद्योगिकी मंत्री श्री रविन्द्र चौबे, लोक निर्माण मंत्री श्री ताम्रध्वज साहू, वन मंत्री श्री मोहम्मद अकबर, स्कूल शिक्षा मंत्री श्री प्रेम साय सिंह टेकाम, महिला अउर बाल विकास मंत्री श्रीमती अनिला भेंड़िया, उद्योग अउर जिला के प्रभारी मंत्री श्री कवासी लखमा अऊ राजस्व मंत्री श्री जय सिंह अग्रवाल, विधायक श्री मोहन मरकाम संग बहुत अकन जनप्रतिनिधि अऊ बड़का संख्या म ग्रामीण उपस्थित रहिन।
