जांजगीर चांपा, कलेक्टर श्री तारन प्रकाश सिन्हा ह आज कलेक्ट्रेट परिसर के सभाकक्ष म साप्ताहिक समय सीमा के बैठक लीन। बैठक म उमन कहिन कि आप सबो अधिकारी मन ल आम जनता के सुविधा बर नियुक्त करे गए हे। ते पाए के सबो शासकीय सेवक ल ये बात के पूरा ध्यान रखना चाही कि आम जनता ल कोनो शासकीय काम बर भटकना झन परय।
बैठक म कलेक्टर ह अवईया 6 अकटूबर ले जिला म राजीव गांधी युवा मितान क्लब स्तर ले शुरू होवइया छत्तीसगढ़िया ओलंपिक के सबो पंचायत मन म भव्य आयोजन करे खातिर अधिकारी मन ल निर्देश दीन। उमन जिला के सबो अधिकारी-कर्मचारी मन ल निरधारित समय म कार्यालय म उपस्थित होके जनता के काम सुगमता ले करे ल कहिन अऊ कोनो प्रकार के लापरवाही पाए जाय म सख्त कारवाई के चेतावनी घलोक दीन। कलेक्टर ह जिला के सबो आदिवासी छात्रावास मन के जीर्णोद्धार करके नवा कलेवर देहे ल कहिन अऊ जिला म गोमूत्र खरीदी बढ़ाय अऊ गोमूत्र ले बनइया उत्पाद के जमीनी स्तर म प्रचार प्रसार करत किसान मन बर प्रदर्शन केंद्र घलोक लगाए के निर्देश संबंधित अधिकारी मन ल दीन।
समय-सीमा के बैठक म कलेक्टर ह सबो विभाग के कामकाज अऊ शासकीय योजना, कार्यक्रम मन के क्रियान्वयन के समीक्षा करत समय सीमा के लंबित प्रकरण मन के विभागवार जानकारी लीन अऊ ओ मन ल जल्दी ले जल्दी निराकरण करे के निर्देश दीन। उमन 1 अकटूबर के गिरदावरी काम के प्रारंभिक प्रकाशन के बाद मिलईया दावा आपत्ति के रिकार्ड व्यवस्थित रखके कारवाई करे अऊ सबो संबंधित मन के उपस्थिति म पंचनामा अनिवार्य रूप ले तियार करे के निर्देश दीन। उमन अवईया 1 नवंबर ले होवया धान खरीदी बर सबो अनुविभागीय अधिकारी (राजस्व) ल धान खरीदी प्रभारी मन के संग आन संबंधित अधिकारी मन के बैठक लेके जरूरी व्यवस्था ठउका रखे ल कहिन।
कलेक्टर ह संपूर्ण शिक्षा जिला मिशन समन्वयक ले जिला के चिन्हांकित स्कूल मन म अकतहा कक्ष निर्माण के काम मन के जानकारी लीन अऊ निर्माण काम तेजी ले करे के निर्देश दीन। एखर संगेच उमन जिला के आत्मानंद स्कूल मन म चलत निर्माण काम मन के अपडेट जानकारी लीन अऊ जरूरी निर्देश दीन। बैठक म उमन कहिन कि अइसन अधिकारी-कर्मचारी जिंकर राज्य स्तर म अऊ जिला स्तर म स्थानांतरण होए हे ओ मन ल तुरंत प्रभाव ले संबंधित कार्यालय म कार्यभार ग्रहण करे बर भारमुक्त करे जाए। कलेक्टर ह बैठक म मुख्यमंत्री कलेक्टर कॉन्फ्रेंस के एजेंडा म घलोक बिंदुवार अधिकारी मन ले अपडेट जानकारी लीन। बैठक म कलेक्टर ह अवैध प्लाटिंग, कृष्ण कुंज, राजीव युवा मितान क्लब, हाट-बाजार क्लिनिक योजना, वृक्षारोपण प्रोत्साहन योजना, धन्वन्तरी योजना, निर्माण काम मन के अपडेट स्थिति, मुख्यमंत्री वृक्षारोपण प्रोत्साहन योजना, मुख्यमंत्री सुपोषण योजना, जाति प्रमाण पत्र, सी मार्ट, आयुष्मान भारत योजना संग आन कई ठन विषय मन उपर विस्तार ले जानकारी लीन अऊ जरूरी निर्देश दीन।
बैठक म जिला पंचायत मुख्य कार्यपालन अधिकारी डॉ फरिहा आलम सिद्दीकी, अपर कलेक्टर श्री एस पी वैद्य संग विभागीय अधिकारी उपस्थित रहिन।
जांजगीर चांपा : जम्मो सरकारी कार्यालय आमजनता के सुविधा बर संचालित हे – कलेक्टर
