धान खरीदी काम म कोनो किसान ल झन होवय परेशानी, ये बात के रखव विशेष ध्यान -कलेक्टर

जांजगीर-चांपा, कलेक्टर श्री तारन प्रकाश सिन्हा ह आज कलेक्टोरेट परिसर के सभाकक्ष म समय-सीमा के हप्‍ता के बैठक लेत सबो विभाग के कामकाज अऊ शासकीय योजना-कार्यक्रम मन के क्रियान्वयन के समीक्षा करिन। बैठक म कलेक्टर ह जिला म धान खरीदी काम सुव्यवस्थित ढंग ले करे अऊ धान खरीदी काम म कोनो किसान ल परेशानी झन होवय, ये बात के विशेष ध्यान रखे के निर्देश दीन। बैठक म कलेक्टर श्री सिन्हा ह पूरा प्रदेश संग जिला म 15 नवम्बर ले शुरू होवइया मानस गायन प्रतियोगिता बर जिला के सबो इच्छुक रामायण मंडली समिति मन के जादा ले जादा पंजीयन करे ल कहिन। उमन बताइन कि प्रदेश म 15 नवंबर ले 15 दिसंबर तक ग्राम स्तर म अऊ 5 जनवरी ले 25 जनवरी तक विकासखंड स्तर म मानस मंडली प्रतियोगिता के आयोजन करे जाही अऊ जतना समिति एखर बर पंजीयन कराहीं उन सबो ल 5 हजार रुपिया प्रोत्साहन राशि घलोक दे जाही। कलेक्टर ह सबो संबंधित अधिकारी मन ल 15 नवंबर ले पहिली जिला के जादा ले जादा समिति मन के पंजीयन चिन्हारी पोर्टल म कराए के निर्देश दीन। एखर संगेच उमन बैठक म उपस्थित राजस्व अधिकारी मन ल राजस्व प्रकरण के तेजी ले निराकरण करे के निर्देश दीन अऊ प्रकरण मन के तेजी ले निराकरण करे बर हफ्ता म दू दिन शिविर लगाय के कार्ययोजना बना के जल्दी ले जल्दी उपलब्‍ध कराए के निर्देश दीन।
समय सीमा के बैठक म कलेक्टर ह उपस्थित तहसीलदार, नायब तहसीलदार, अनुविभागीय दंडाधिकारी (राजस्व), अपर कलेक्टर संग सबो राजस्व अमला ल धान खरीदी केन्द्र मन म सरलग निगरानी रखत सबो व्यवस्था ठउका रखे के निर्देश दीन। उमन जिला म कोनो प्रकार के अवैध धान आवागमन करे के संग कोनो अवैध गतिविधि मन म संलिप्त कोचियां, बिचौलिया मन के खिलाफ सख्त कार्रवाई करे ल कहिन। एखर संगेच उमन कहिन कि कहूं कोनो पात्र किसान के गिरदावरी काम म लिपिकीय गलती के कारण कुछ गलती पाए जात हे त एकर जांच करत कलेक्टर कार्यालय म सूचित करव। जेखर से किसान मन ल कोनो प्रकार के नुकसान ले बचाया जा सकश्‍। कलेक्टर ह जिला म मुख्यमंत्री सुपोषण योजना संग कई ठन योजना मन के बेहतर ढंग ले क्रियान्वयन करे के निर्देश दीन। जेखर से आमजनता ल जादा ले जादा लाभ देवाए जा सकय।
बैठक म कलेक्टर ह मुख्यमंत्री श्री भूपेश बघेल के जिला म भेंट मुलाकात अभियान के समय आए आवेदन मन के निराकरण के स्थिति, जनशिकायत के प्रकरण अऊ विभागवार लंबित प्रकरण मन के जानकारी लीन अऊ ओखर जल्दी से जल्दी निराकरण करे के निर्देश दीन। एखर संगेच बैठक म कलेक्टर ह जिला म संचालित आंगनबाड़ी के स्थिति, स्‍वामी आत्मानंद स्कूल मन म खाली पद मन के जानकारी, राजीव गांधी भूमिहीन कृषि मजदूर न्याय योजना, जाति प्रमाण पत्र के अपडेट स्थिति, नरवा के काम, मनरेगा, हमर लैब के काम, लोक सेवा गारंटी, कृष्ण कुंज, राजीव युवा मितान क्लब, हाट-बाजार क्लिनिक योजना, धन्वन्तरी योजना, निर्माण काम मन के अपडेट स्थिति, मुख्यमंत्री वृक्षारोपण प्रोत्साहन योजना, मुख्यमंत्री सुपोषण योजना, सी-मार्ट, आयुष्मान भारत योजना संग आन कई ठन विषय म विस्तार ले जानकारी लीन अऊ जरूरी निर्देश दीन। कलेक्टर ह स्वास्थ्य सुविधा मन के सुदृढ़ीकरण बर जीवनदीप समिति के नियमित बैठक करे के निर्देश दीन। बैठक म जिला पंचायत मुख्य कार्यपालन अधिकारी डॉ. ज्योति पटेल, डीएफओ श्री सौरभ सिंह, अपर कलेक्टर श्री एस पी वैद्य संग विभागीय अधिकारी उपस्थित रहिन।