जांजगीर-चांपा: गोठान ले बदलत हे स्व-सहायता समूह के महिला मन के जिंदगी

जांजगीर-चांपा, जांजगीर जिला के अकलतरा विकासखंड के ग्राम पंचायत तिलई म मल्टीएक्टिविटी गौठान के निर्माण करे गए हे। ये मल्टीएक्टिव गोठान 38 एकड़ म फइले हे। जिहां स्वसहायता समूह के दीदी मन साग-भाजी के खेती करके सफलता के कहानी गढ़त हें। समूह के महिला मन जबर मेहनत करके अपन किस्मत ल बदले के संग परिवार के आर्थिक स्थिति ल मजबूत करत स्वरोजगार कोति आगू बढ़त हें। इहां स्व सहायता समूह के महिला मन ल प्रेरित करत ऊंखर माध्यम ले सब्जी बाड़ी के काम शुरू कराए गए हे।
तिलई गौठान म दू समूह ह 2021-22 ले ये काम करत हे। ये मां दुर्गा अउ जय अन्नधारी स्व सहायता समूह मन के महिला मन गोठान म सब्जी उत्पादन करत हें। समूह के महिला मन ह बताइन कि ये सीजन ओ मन ल सब्जी बेचके 61 हजार रूपिया नगदी कमई करे हें।
गोठान म दुर्गा स्व सहायता समूह के अध्यक्ष श्रीमती कृष्णा कौशिक अउ जय अन्नधारी स्व सहायता समूह के अध्यक्ष श्रीमती अनिता यादव ह बताइस कि ओ मन गौठान म करेला, टमाटर, बैगन, भिंडी, लौकी, पालक भाजी, धनिया, लाल भाजी, मूली, आलू, प्याज लगाए हें। उमन जैविक खाद के परयोग करके स्वास्थ्य के घलोक ध्यान रखत हें। उमन बताइन कि ओ मन पाछू दू बछर ले साग-भाजी उपजावत हें। उहें गौठान म आरती स्वसहायता समूह के महिला मन गेंगरूवा (केचुआ) ले जैविक खाद, बतख पालन, मुर्गी पालन के संगे संग गोमूत्र ले ब्रह्मास्त्र अउ जीवामृत तियार करत हें। समूह ह इहां फूल गोभी, पत्ता गोभी, गांठगोभी, धनिया, मेथी, शकरकंद, बैंगन, भिंडी, लौकी, पालक भाजी, धनिया, लाल भाजी, मूली, आलू, प्याज आदि लगाए हें। इहां सबो समूह के महिला मन के मेहनत रंग लावत हे। ऊंखर लगाए साग-भाजी ल तीर-तखार के गांव के मनखे मन बिसावत हें। अउ हाटबाजार म घलोक समूह के महिला मन के साग बिके लगे हे।
एखर ले पहिली 2021 म दुर्गा स्व सहायता समूह ह एनआरएलएम के माध्यम ले बैंक लिंकेज करत बाड़ी विकास बर 1 लाख रूपिया के करजा देहे गए रहिस, जेमां ले उमन सब्जी भाजी के उत्पादन ले मुनाफा कमाके 50 हजार रूपिया चुका तको डरे हें अऊ रिवाल्विंग फंड ले ओ मन ल 15 हजार रूपिया मिले तको हे। उहें अन्नधारी समूह बर घलोक 15 हजार रूपिया रिवाल्विंग फंड मिले हे, जेखर से वो मन गतिविधि संचालित करत हें। एखर अलावा इहां सीता स्वसहायता समूह कोति ले नेपियर घास के उत्पादन घलोक करे जात हे। उद्यान विस्तार अधिकारी मन इहां सरलग आके सब्जी के उन्नत खेती बर तकनीकी जानकारी देवत हें ताकि जादा ले जादा उत्पादन करके महिला मन ल लाभ प्राप्त हो सकय।