कलेक्टर के निर्देश म एसडीएम अऊ सिंचाई विभाग के अधिकारी मन ह करिन निरीक्षण
जांजगीर-चाम्पा, पामगढ़ विकासखंड के ग्राम बारगांव म क्षतिग्रस्त होए नहर ले खेत अऊ घर म पानी घुसे ले होए नुकसान के जांच अऊ पानी ले गांव वाले मन के बचाव बर कलेक्टर श्री तारन प्रकाश सिन्हा के निर्देश म एसडीएम संग जल संसाधन विभाग के अधिकारी मन ह मौका म निरीक्षण करिन। कलेक्टर ह नहर के क्षतिग्रस्त भाग ले पानी के बहाव ल रोके खातिर लउहे मरम्मत करे अऊ एखर से होए नुकसान के जांच करके रिपोट तियार करे के निर्देश देहे हें। सिंचाई विभाग ह पानी के तेज बहाव ल नियंत्रित करके नहर के क्षतिग्रस्त भाग के मरम्मत करे जात हे।
कलेक्टर के हुकुम म आज पामगढ़ एसडीएम श्री बी एस मरकाम, जल संसाधन विभाग के अधिकारी अऊ तहसीलदार संग आन राजस्व अधिकारी मन ह बारगांव म घटनास्थल के निरीक्षण करिन। पामगढ़ एसडीएम श्री मरकाम ह बताइस कि सिंचाई विभाग के अधिकारी मन के संग घटनास्थल के मुआयना करे गीस। सिंचाई विभाग कोति ले इहां मरम्मत के काम चालू कर दे गए हे। फसल संग जेन नुकसान होय हे ओखर रिपोट बनाए जात हे। नहर के पानी ले प्रभावित मन ल राहत घलोक पहुंचाए जात हे। इहां 2 किसान परिवार के घर म पानी घुसरे के बाद ए परिवार के राशन संग आन व्यवस्था घलोक कर देहे गए हे। फिलहाल स्थिति नियंत्रण म हे अऊ कोनो प्रकार के जनहानि घलोक नइ होए हे।