चौपाल लगाके कलेक्टर ह गांव वाले मन ल रोजगार ले जुड़े खातिर करत हें प्रेरित
गौठान मन म प्रोसेसिंग यूनिट लगाके गांव वाले मन ल रोजगार देहे के पहल होवत हे शुरू
जांजगीर-चाम्पा, आप मन मेहनत के मोल ल समझव, पइसा कमाए बर मेहनत करे बर परथे, ओई हर आगू बढ़थे। फोकट मं कुछू नई मिलय, बने बुता ल करिहव त, अड़बड़ पइसा कमा के अपन पइर मं खड़े हो पइहा। हमर काम हे, सरकार के योजना ल बताना अउ आप मन ल समझा के आगू बढ़ाना। आज गांव-गांव मं गौठान बन गे, खाली जमीन मन गाय-गरवा बर सुरछित हो गे। अब इहां गांव के दाई-दीदी, युवा मन रोजगार पा सकयं, ऐकर खातिर आप मन के गांव ल चुने गए हे। गौठान मं मसाला, मशरूम, पोहा, आचार, पापड़, बरी संग अलग-अलग सामान बनाय बर मशीन लग जाही अउ मन लगा के मेहनत करहू त आप मन मन ल आगू बढे बर कोनो रोक नई सकय। कुछ अइसनहे गांव-गांव के चिन्हित गौठान मन म जाके कलेक्टर श्री तारन प्रकाश सिन्हा ठेठ छत्तीसगढ़ी म गांव के महिला, युवा मन ल ग्रामीण औद्योगिक पार्क के विशेषता मन ल बतावत हें। संगेच एखर से पनपइया रोजगार के साधन ल अऊ आत्मनिर्भरता के संग समृद्धि अऊ खुशहाली के नवा संभावना मन ल बतात सबला आगू बढ़े बर प्रेरित करत हें।