बरभाठा के गांव वाले मन बर बखरिया दर्री डबरी तालाब बनिस वरदान

जांजगीर-चांपा, जिला के डभरा ब्लाक के ग्राम पंचायत भेड़ीकोना के आश्रित ग्राम बरभांठा म बखरिया दर्री डबरी तलाब ले आज गांव के मनखे मन ल भरपूर पानी मिलत हे। गांव बर ये तलाब वरदान साबित हो रहा हे। महात्मा गांधी राष्ट्रीय ग्रामीण रोजगार गारंटी योजना के माध्यम ले तलाब के गहरीकरण करे गीस। ये काम ले गांव म ही मनरेगा जॉबकार्डधारी परिवार ल रोजगार मिलीस अऊ गांव वाले मन ल निस्तारी बर भरपूर पानी घलोक उपलब्‍ध होवत हे।
जिला मुख्यालय ले करीबन 90 किलोमीटर दूर जनपद पंचायत डभरा के अंतर्गत पंचायत भेड़ीकोना के आश्रित ग्राम बरभांठा के गांव वाले मन ह कभू नइ सोचे रहिन कि गांव के जुन्ना तालाब के कभू गहरीकरण हो सकही। तालाब म फैलत गंदगी, कचरा ले परेशान गांव वाले मन ह तय करिन कि ये तालाब के सफाई कराए जाय। गांव वाले मन ह एकजुट होके बखरिया दर्री डबरी तालाब गहरीकरण बर प्रस्ताव दीन। महात्मा गांधी नरेगा ले ये काम ल मंजूरी देहे गीस।
गांव वाले मन ह बताइन कि ये तालाब के कहानी बहुत जुन्ना हे। कभू मनखे तालाब के पानी पियत रहिन। फेर धीरे-धीरे ये अपन अस्तित्व खोत गीस अऊ प्रदूषण के सेती ये तालाब निस्तारी के लायक घलोक नइ बांचिस। गंदगी अऊ बदबू के सेती मनखे तालाब के नजदीक घलोक खड़ा होना पसंद नइ करत रहिन। सरपंच ह एखर साफ-सफाई कराए बर मनरेगा के अधिकारी मन ले चर्चा करिन। महात्मा गांधी नरेगा के माध्यम ले प्रस्ताव तियार करे गीस। महात्मा गांधी नरेगा के माध्यम ले साल 2020-21 म 8.79 लाख रूपिया ले तालाब गहरीकरण अउ पचरी निर्माण शुरू करे गीस। एखर से 205 परिवार ह काम करत 3 हजार 327 मानव दिवस के रोजगार प्राप्त करिस। ये काम म गांव के मनरेगा जॉबकार्डधारी परिवार ल गांवे म ही रोजगार मिले ले बाहिर कमाए खाए नइ जाना परिस।
गांव के श्री श्यामलाल सिदार, श्री गौरीशंकर चंद्रा, श्री महेश्वर सिदार, श्री राजेश सिदार ह कहिन कि बारिश के बाद जब तलाब म पानी भरिस त गांव वाले मन के उम्मीद घलोक जाग उठिस। तालाब म पचरी निर्माण होए ले मनखे मन ल काफी सुविधा होवत हे। तालाब म पानी के उपयोग रोजेच नहाए, कपड़ा धोए अऊ निस्तारी उपयोग बर करे जात हे।
जिला पंचायत सीईओ श्री गजेन्द्र सिंह ठाकुर के बताती महात्मा गांधी नरेगा के माध्यम ले जॉबकार्डधारी परिवार ल गांवे म ही रोजगार मिलत हे, त दुसर कोति गांव म स्थायी परिसंपत्ति मन के निर्माण अउ जल संरक्षण के दिशा म बेहतर काम करे जात हे। सरपंच श्रीमती गूंजदेवी चंद्रा ह बताइस कि गांव म महात्मा गांधी नरेगा ले तालाब के निर्माण बाद गांव वाले मन ल बहुत फायदा होए हे। गांव के मनखे मन ल मनरेगा ले मजदूरी मिलीस त दुसर कोति निस्तारी बर पानी। मनरेगा योजना ले सबो लाभान्वित होइन।