जांजगीर-चांपा, विकासखण्ड पामगढ़ के ग्राम मेऊ निवासी कुमारी छठबाई के कालेज जाना आसान हो गए हे। ओला आज कलेक्टर श्री जनक प्रसाद पाठक ह मोटराईज्ड ट्रायसिकल प्रदान करिस। कलेक्टर ह कुमारी छठबाई ले कालेज के पढ़ाई के संबंध म चर्चा करत ओखर उज्ज्वल भविष्य के कामना करिस। कुमारी छठबाई ह खुश होके बताइस कि अब वोला कालेज आए-जाए बर कखरो उपर निर्भर नइ रहे ल परय। बीएससी दूसर साल के पढ़ाई बर ओला रोज कालेज जाना परथे। मोटराईज्ड ट्रायसिकल मिले ले वो अब ककरो उपर निर्भर नइ हे अब वो ह अपन पढ़ई पूरा मन लगाके करही।
हम आप ल बता देवन कि कुमारी छठबाई ह आज जनदर्शन म कलेक्टर श्री जनक प्रसाद पाठक ल आवेदन देके ट्रायसिकल देवाए के आग्रह करे रहिस। कलेक्टर ह छठबाई के समस्या के तुरंते समाधान करे बर समाज कल्याण विभाग के उप संचालक श्री टी.पी. भावे ल निर्देश दीन। श्री भावे ह जल्दी कार्यवाही करत जनदर्शन के बेराच म ट्रायसिकल उपलब्ध कराइस। श्री भावे ह बताइस कि 80 प्रतिशत ले जादा अस्थिबाधित ल समाज कल्याण के कृत्रिम सहायक उपकरण प्रदाय योजना के तहत मोटराईज्ड ट्रायसिकल देहे जाथे। एखर बर संबंधित नगरीय निकाय या जनपद पंचायत म दिव्यांग प्रमाण पत्र के संग आवेदन करे जा सकत हे। आवेदक आयकर दाता नइ होना चाही। जादा जानकारी बर जिला पंचायत स्थित समाज कल्याण विभाग के कार्यालय ले संपर्क करे जा सकत हे।
