रायपुर, परंपरा के मुताबिक मुख्यमंत्री श्री भूपेश बघेल हर साल प्रदेश के मंगल कामना अऊ खुसहाली बर अऊ बिघ्न के नाश बर कुश के सोटा सहिथें। आज घलोक ग्राम जंजगिरी म उमन ये परंपरा ल निभाईन। इहां के बीरेंद्र ठाकुर ह उंकर उपर सोटा के प्रहार करिन। ए संबंध म गांव वाले मन बताथें कि ये प्राचीन परंपरा हे, सोटा के प्रहार बिघ्न-बाधा के नाश करइया होथे, संगेच सुख अऊ समृद्धि लेके आथे। मुख्यमंत्री ह ये बेरा म गांव वाले मन ले कहिन कि हर साल भरोसा ठाकुर प्रहार करत रहिस। अब ये परंपरा वोखर बेटा बीरेंद्र ठाकुर निभावत हे। गांव वाले मन ले चर्चा म उमन कहिन कि गोवर्धन पूजा गोवंश के समृद्धि के परंपरा के पूजा ये, जतका समृद्ध गोवंश होही ओतकेच हमर तरक्की होही। एकरे सेती गांव मन म गोवर्धन पूजा अतका लोकप्रिय हे। मनखे मन साल भर एकर अगोरा करथें। एक प्रकार ले ये पूजा गोवंश के प्रति हमर कृतज्ञता के चिनहा घलोक ये।
हर साल आप मन के बीच मैं बिहनहा-बिहनिया पहुंचथंव अऊ मोला बहुत खुशी होथे। गोवर्धन पूजा लोक के उत्सव के परंपरा ये। हमार पूर्वज मन ह बहुत सुंदर छोट-छोट परंपरा मन के सृजन करे रहिन अऊ ए परंपरा मन के माध्यम ले हमार जीवन म उल्लास भरथे। आज आप सबके बीच पहुंचके अऊ ये हर्षित जनसमूह ल देखके मोरो मन घलोक हर्ष ले भर गए हे। गोवर्धन पूजा अऊ गौरा गौरी पूजा मिट्टी के प्रति गहिर अनुराग के उत्सव ये। उल्लास ले भरे आप मन के चेहरा देखके अनुभव होथे हे कि हमर प्रदेश सांस्कृतिक रूप ले कतका समृद्ध हे अऊ हम ये सांस्कृतिक समृद्धि ल कइसे धरोहर के रूप म सहेजे राखे हन। मुख्यमंत्री ह ये बेरा म कहिन कि अपन माटी के अस्मिता ल सहेजना ओखर संवर्धन करना हम सब के कर्तव्य हे। कतेक सुंदर परंपरा हमार छत्तीसगढ़ के हे। ये बात के आशंका रहिस कि धीरे-धीरे ये परम्परा मन कहूं नंदा झन जाए। गांव वाले मन ले चर्चा म मुख्यमंत्री ह कहिन कि हमन ये संकल्प लेहेन कि अपन सांस्कृतिक परंपरा मन ल अपन व्यवस्था म शीर्षस्थ स्थान देबोन काबर के परंपरा ले हमर अस्तित्व घलोक हे परंपरा ले हमार मूल्य घलोक हे। मुख्यमंत्री ह कहिन कि हमर ग्रामीण संस्कृति के पर्व कृषि ल बढ़ावा देवइया पर्व ये। पर्व के माध्यम ले हम जमीन ले जुड़थन। मुख्यमंत्री ह ये बेरा म गौरा गौरी पूजा म घलोक हिस्सा लीन अऊ मनखे मन ल संबोधित करिन। उमन कहिन के अतका सुंदर पूजन अऊ एकर बाद परब के उल्लास के अभिव्यक्ति आप मन करत हव। आप मन के बीच आना मोला हमेशा आनंदित करथे अऊ मैं हमेशा ये बेरा के अगोरा मरहिथंव, ये बेरा म मैं कामना करत हंव कि हमर प्रदेश निरंतर तरक्की के रद्दा म आगू बढ़य। आप मन के जीवन म खुशहाली आवए। आप मन बर मैं मंगल कामना करत हंव।