रायपुर, 24 मई 2024। मुख्यमंत्री विष्णु देव साय के सरकार म जन समस्या मन के निराकरण बर अब अफसर मन के जिम्मेदारी तय करे जात हे। मंत्रालय ले लेके जिला स्तर तक नोडल अउ अपीलीय अधिकारी मन के नियुक्ति होही। जेन पंद्रा दिन के अंदर आवेदन मन के निराकरण करहीं। छत्तीसगढ़ सरकार के स्लोगन “विष्णु के सुशासन” ल चरितार्थ करे के दिशा म ये एक बड़का कदम माने जात हे।
आम तौर म बेहद शांत अऊ सरल मुख्यमंत्री साय ह एक साक्षात्कार म कहे रहिन कि आम तौर मं ओ मन बेहद शांत हे, फेर जनता के समस्या मन के निराकरण म लापरवाही बरतइया अफसर मन उपर ओ मन ल गुस्सा आथे। हो सकथे इही कड़ी म सीएम साय ह मुख्यमंत्री जन चौपाल पोर्टल म मिले समस्या मन के जल्दी अऊ उचित निदान बर एक बड़का फैसला लेहे हें। एखर तहत नोडल अधिकारी अऊ अपीलीय अधिकारी के नियुक्ति होवइया हे। मंत्रालय स्तर म अवर सचिव नोडल अधिकारी होही जबकि उपसचिव अपीलीय अधिकारी होही। अइसनहे जिला स्तर म डिप्टी कलेक्टर या संयुक्त कलेक्टर नोडल अफसर होही अऊ अपर संचालक ल अपीलीय अधिकारी के दायित्व मिलइया हे। जबकि संचालनालय स्तर म सहायक संचालक नोडल अफसर होही अऊ अपर कलेक्टर अपीलीय अधिकारी होही।
साय सरकार ह जनता ले मिले आवेदन मन के गुणवत्तापूर्वक अऊ जल्दी निराकरण बर अफसर मन ल केवल पंद्रा दिन के समय देना निरधारित करे गए हे। संबंधित विभाग या शाखा ह आवेदन मन के संबंध म कार्यवाही पूरा करे के बाद संबंधित नोडल अधिकारी ओखर परीक्षण करहीं अऊ आखरी निराकरण के कार्यवाही म अपन मुहर लगाहीं। व्यवस्था ये होही कि जेन विभाग मन या जिला मन के पंद्रा दिन के भीतर आवेदन मन के सही तरीका ले निराकरण नइ होही त ओखर सूची अपने आप पोर्टल म दिखे लगही।
अतकेच नही साय सरकार ह आवेदक मन ल उंखर आवेदन के निराकरण के जानकारी अउ निराकरण के बाद फीडबैक अउ अपील करे के सुविधा देवइया हे। जेखर से आवेदक के प्रकरण मन के निराकरण के गुणवत्ता म बढ़ोतरी हो सकय। सुशासन के राज स्थापित करे के दिशा म सांय-सांय निर्णय ले वत विष्णु देव के सरकार सबो नियुक्त नोडल अउ अपीलीय अधिकारी मन के नाम-पदनाम, मोबाइल नंबर अऊ ईमेल आईडी के जानकारी घलोक अपन कार्यालय म रखही।
जनता के समस्या के जल्दी निराकरण ही हमर मकसद अइसे कहत हें विष्णु देव साय। आम आदमी के दिक्कत ल तुरंते दूर करना ही हमर सरकार के मकसद हे। मुख्यमंत्री जन चौपाल पोर्टल म आए आवेदन मन के जल्दी निराकरण जनता बर राहत भरे होही। ते पाए के मुख्यमंत्री जन चौपाल पोर्टल म आवेदन मन के संबंध म नोडल अफसर नियुक्त होही, जेन पंद्रह दिन के भीतर आवेदन मन के संतुष्टीदायक निराकरण करहीं। संतुष्टि नइ होए म आवेदक अपील घलोक कर सकही। जेखर बर अपीलीय अधिकारी घलोक नियुक्त होही। अफसर मन के जिम्मेदारी घलोक तय करे जाही।