छत्तीसगढ़ जनसंपर्क अधिकारी संघ ह मुख्यमंत्री के प्रति जताइस आभार
रायपुर, छत्तीसगढ़ जनसंपर्क अधिकारी संघ ह छत्तीसगढ़ म सरकारी सेवक मन बर जुन्ना पेंशन योजना लागू करे के घोषणा बर मुख्यमंत्री श्री भूपेश बघेल के प्रति आभार व्यक्त करे हे। संघ ह एला प्रदेश के कर्मचारी मन के हित म ऐतिहासिक फैसला बताए हे। जानबा हे कि मुख्यमंत्री श्री भूपेश बघेल ह आज अपन बजट भाषण म राज्य म जुन्ना पेंशन योजना लागू करे के घोषणा करे हें। प्रदेश के अधिकारी-कर्मचारी बिक्कट दिन ले जुन्ना पेंशन योजना लागू करे के मांग करत रहिन। मुख्यमंत्री श्री भूपेश बघेल ह उंखर मांग उपर गंभीरतापूर्वक विचार करत जुन्ना पेंशन योजना लागू करे के घोषणा करे हें।
छत्तीसगढ़ जनसंपर्क अधिकारी संघ के अध्यक्ष श्री बालमुकुन्द तम्बोली ह मुख्यमंत्री श्री बघेल ल धन्यवाद ज्ञापित करत कहिन कि प्रदेश के लोकप्रिय मुख्यमंत्री श्री बघेल ह ये निर्णय लेके अपन संवेदनशीलता के परिचय देहे हे। श्री तंबोली ह कहिन कि सरकारी सेवक मन के हित म लेहे गए ये फैसला कर्मचारी मन ल दूरगामी राहत प्रदान करइया कदम ये। उमन कहिन कि पेंशन सरकारी सेवक मन बर बुढ़ापा के सहारा होथे। ओ मन ल पेंशन मिले ले ऊंखर मन म भविष्य के प्रति सुरक्षा के भावना उत्पन्न होथे। जुन्ना पेंशन योजना म कर्मचारी मन ल सेवानिवृत्ति के बाद एक निश्चित पेंशन राशि प्राप्त होही। संगेच आश्रित परिवार ल पेंशन के लाभ मिलही। ये घोषणा ले कर्मचारी मन के संगें-संग ऊंखर परिजन मन म घलोक खुशहाली के माहौल हे। एखर से सरकारी अधिकारी अऊ कर्मचारी जादा उत्साह अऊ समर्पण भाव ले काम करहीं अऊ छत्तीसगढ़ के विकास म सहभागी बनहीं।
छत्तीसगढ़ जनसंपर्क अधिकारी संघ के संरक्षक श्री जे एल दरियो, श्री उमेश मिश्रा, प्रधान संयोजक श्री संजीव तिवारी, महासचिव श्री आलोक देव, उपाध्यक्ष श्री पवन गुप्ता, श्री हीरा देवांगन ह कहिन कि जुन्ना पेंशन बहाली के घोषणा छत्तीसगढ़ के शासकीय सेवक मन के परिवार बर खुशी के सौगात लेके आए हे। शासकीय कर्मचारी अऊ उंखर परिवार के चिंता अब दूर हो गए हे। ये घोषणा ले शासकीय सेवक अऊ ऊंखर परिजन मन के भविष्य हमेशा बर सुरक्षित हो गए हे।