दुर्ग, काली जापान इंटरनेशनल कोऑपरेशन एजेंसी ( जीका ) के अधिकारी मन के दल दुर्ग जिला के अधिकारी मन के संग धमधा विकासखंड के संडी गौठान पंहुचिन। जिहां उमन गौठान म संचालित होवइया कालजिविका मूलक गतिविधि मन के निरीक्षण करिन। गाय मन के संरक्षण अऊ ऊंखर आन उत्पाद ले कइसे एक इकोसिस्टम के निर्माण करे जा सकत हे, ये देख के जापान के दल प्रभावित होइन। उमन गौठान म वर्मी कपोस्ट खाद के उत्पादन, हैचरी, ब्रूडिंग हाउस, पोल्ट्री रैरिंग, बटेर पालन, सामुदायिक बाड़ी अऊ स्व सहायता समूह के महिला मन के काम मन के अवलोकन करिन। उमन उपस्थित अधिकारी मन के माध्यम ले सबो काम म लगे स्वसहायता समूह के महिला मन ले चर्चा घलोक करिन। कइसे एक गौठान पशु ले लेके मानव बर हितकर हो सकत हे उमन ये कांसेप्ट ल समझिन अऊ ओखर सराहना करिन। उंखर कहना रहिस कि अइसन कांसेप्ट उमन पहली पइत देखे हें, जेखर से ग्रामीण अर्थव्यवस्था मजबूत होथे।
स्व- सहायता समूह के महिला मन के होवत आमदनी ले अवगत होके उमन अपन प्रसन्नता जाहिर करिन अऊ महिला सशक्तिकरण कोति एला एक सार्थक पहल घलोक कहिन। एखर बाद दल गिरहोला म कृषक श्री मयंक चौहान के खेत पहुंचिन जिहां उमन प्लग टाइप वेजिटेबल सीडलिंग अउ ड्रैगन फ्रूट के खेती देखिन अऊ खेती के ये एडवांस स्तर ल देखके वो मन प्रभावित होइन। भ्रमण दल म जीका हेडक्वार्टर टोक्यो ले श्री कोइडे सोटा डिप्टी डायरेक्टर जीका, मिस एच शशाकि कंट्री ऑफिसर अउ काओरी फ्रूयामा प्रतिनिधि जीका इंडिया, अनुराग सिन्हा प्रिंसिपल डेवलपमेंट स्पेशलिस्ट अउ आन अधिकारी अऊ कर्मचारी उपस्थित रहिन।
गौठान ल देखके जापानी मन होइन प्रभावित: देस-प्रदेस ले अब बिस्व म बाजिस डंका
