बसुंदरा बईगा मन ह भूत भगवारे के नाम म करिन लाखों के ठगी: हो जावव सावधान

जशपुर, खबर हे के भूत भगवारे के नाम म महिला ले लाखों के ठगी के हो गए हे। मामला के बारे म जानकारी देवत पुलिस ह बताइस के भूत भगवारे बर पहिली पूजा-पष्‍ट के आयोजन करे गीस। जेखर बाद ठगईया मन ह 1 लाख 62 हजार नगदी अऊ गहना लेके तांत्रिक अऊ ओखर गिरोह मौका ले फरार हो गे। महिला ह मामला के शिकायत थाना म करे हे। पुलिस आरोपी मन के तलाश म जुटे हे। ये मामला कुनकुरी थाना के कमतरा गांव के ये।

महिला ह अपन लिखाए रपट म कहे हे के-
मैं बेहराटोली पंचायत के कमतरा गांव, पोस्ट जोकारी के रहइया आंव, घर गृहस्थी के काम करथंव, दिनांक 31.03.22 के मोर घर तीर 8 मनखे आए रहिन जेमां महिला पुरूष अउ लइका रहिन उंखर सो मोर बातचीत होइस त, उमन मोर समस्या के बारे म पूछिन त मैं अपन दुख तकलीफ ल बताएंव, त वोमे ले एक मनखे भगत (पुजारी) जइसे आदमी के फोटो देखाइस अऊ बोलिस के तोर घर म भूत प्रेत के साया हे, पूजा पाठ कराना परही अइसे कहि के 1 लाख 62 हजार रूपिया अउ घर म रखे कुछ सोना चांदी जेकर कीमत 41900/- हजार रूपिया कुल जुमला रकम 203900/- (दो लाख तीन हजार नौ सौ) रूपिया ल अज्ञात मनखे मन ह ठग के ले गें।
अपन अवेदन म शिलवन्ती बाई पति जतरू राम ह लिखे हे के बईगा मन घर वोकरे घर तीर खाना बनाइन, रात म उहें रूकिन, अऊ मोला अपन बातचीत म फंसाके मोर घर के भूत ल भगवारे बर पूजा पाठ करे बर 1 लाख 50 हजार रूपिया के खरचा बताईन, मैं उंकर झांसा म आ गएयेंव अऊ 2-3 दिन तक पइसा जुगाड़ के । 80,000 रू. मोर खाता ले निकलवाके अउ अपन पास रखे रूपिया कुल मिलाके 1 लाख 62 हजार रूपिया उंखर हाथ म दे इेंव। उंखर बोले म घर म रखे कुछ सोना चांदी ल तको दे देंव त ओ मन वोला एक कपड़ा के पोटली म बांधके एक लाल झोला के भीतरी म रखिन अऊ एला पूजा करना अऊ तीन दिन के बाद खोलना बोले रहिन। तब मैं तीन दिन के बाद दिनांक 08.04.22 के संझा झोला के भीतरी के मोटरी कपड़ा ल खोलेंव त वोमे सोना चांदी के जगा गुरमुटाए कागज के एक बंडल अउ एक सुक्‍खा नरियर रहिस। मोर सोना चांदी नइ रहिस।