पदमा देवी मनरेगा म मेट बनके बदलत हे गांव के तकदीर

जशपुरनगर, आज के दौर म समाज ल विकास के रद्दा म आगू बढ़ाए म महिला मन बखूबी अपन भागीदारी निभावत हें। आज महिला मन खेल, राजनीति, शिक्षा, समाजसेवा व्यवसाय जइसे हर क्षेत्र म सफलता प्राप्त करके अपन वर्चस्व स्थापित करत हें। कांसाबेल विकासखण्ड के ग्राम पंचायत देवरी के मनरेगा मेट पदमा देवी अपन गाँव के विकास अऊ मनखे मन के उन्नति म महत्वपूर्ण भूमिका निभावत हे। पदमा देवी अपन क्षेत्र म मनरेगा के तहत् कई ठन सामुदायिक अऊ हितग्राही मूलक काम मन ले मनखे मन ल लाभ पहुंचाए अऊ ग्राम विकास कार्य के योजना बनात बेरा म महिला अऊ कमजोर वर्ग के भागीदारी बढ़ाए ल लेके विशेष काम करत हे। संगेच गाँव म सरकार के योजना मन के प्रचार-प्रसार अऊ मनखे मन ल रोजगार गांरटी योजना ले जोड़ के ओ मन ल आर्थिक लाभ घलोक पहुँचावत हे।
पदमा अपन ग्राम पंचायत म विकास कार्य ल बढ़ावा देवत न सिरिफ गांव के मनखे मन ल मनरेगा के तहत् रोजागर देवाए के काम करत हे, भलुक अपन गांव म कई ठन योजना ले मनखे मन ल लाभ प्रदान करे म उंखर सहायता घलोक करत हे। गांव म डबरी, कुंआ, तालाब, जमीन समतलीकरण, सामुदायिक भवन संग आन सामुदायिक अऊ हितग्राही मूलक काम मन ल गांव वाले मन तक पहुचा के ओ मन ल योजना ले लाभ पहुँचावत हे। जेखर से गांव के सबो मनखे मन ल रोजगार के संग सुविधा घलोक मिलत हे। संगेच ग्रामीण महिला मन ल एनआरएलएम बिहान ले जोड़के ओ मन ल कई ठन आजीविका काम ले जोड़के रोजगार देवा के उंखर आर्थिक स्थिति म बढ़ोत्तरी करत हे।
पदमा बताथे कि गांव म अपन प्रारंभिक पढ़ाई पूरा करे के बाद वोखर तिर कोई रोजगार नइ रहिस। परिवार के आर्थिक स्थिति सुदृढ़ नइ होए के सेती ओ ल आगू के पढ़ाई घलोक बीच म रोके ल परिस। पदमा म अपन आस पास के क्षेत्र म बदलाव अऊ विकास लाय के इच्छाशक्ति शुरूआत ले ही रहिस। ए बात ल जान के गांव के सरपंच ह ओ ल मेट बने के सलाह दीस। पदमा ह तुरंते मनरेगा म मेट के काम करना शुरू कर दीस। मेट बने के बाद म लम्बा समय पंचायत म काम करे बाद रोजी मिले लगीस तेकर से परिवार के स्थिति ठीक होए लगीस। वो ह अपन आगू के पढ़ई घलोक धीरे-धीरे जारी रखीस। जेखर से ओखर पारिवारिक स्थिति म घलोक काफी सुधार आए लगिस।
मेट के रूप म चयन प्रशिक्षण ग्राम सरंपच, सचिव अऊ रोजगार सहायक मन दीन जेन म रूची अऊ बाढ़ीस। एखर बाद योजना के मुताबिक भुमि सुधार, तालाब निर्माण, कुआं निर्माण, शेड निर्माण काम स्वीकृति अऊ कमजोर परिवार मन ल 100 दिन रोजगार प्रदान करे म वो ह अपन भूमिका अदा करे लागिस।
पदमा ह मेट बने के बाद अपन मजदूर मन ल कार्यस्थल म सुविधा देवाए के दृष्टि ले पीए के पानी अऊ छावनी के घलोक व्यवस्था कराईस जेखर से मजदूर मन ल मध्यान्ह भोजन के समय म पेयजल अऊ छांव के सुविधा मिल सकय। संगेच वो ह हरेक कार्यस्थल म चिकित्सा सुविधा बर मेडिकल किट घलोक रखवाइस। जेखर से काम के समय कोनो ल चोट लगे म या आन तात्कालिक उपचार मजदूर मन ल मिल सकय। वो ह महिला मन ल रोजगार ले जोड़े बर विशेष प्रयास करिस। महिला मन ल जागरूक करे बर घर-घर जाके ओ मन ल समझाईश देहे के संग स्व-सहायता समूह के काम म घलोक सामिल करिस। जेखर से महिला मन म रोजागर के प्रति रुचि विकसित होइस। जेखर से अब स्व-सहायता समूह के महिला मन के घलोक आर्थिक स्थिति के संग रोजागर के साधन म वृद्धि होए हे। वो ह 100 दिवस के रोजगार प्राप्त करे बर घलोक ग्रामीण परिवार के सदस्य मन ल प्रोत्साहित करिस। संगेच वन अधिकार पट्टाधारी परिवार के घलोक चिन्हांकन करके ओ मन ल अकतहा रोजगार दिवस देवाए के उदीम करिस। वो ह कोविड के समय घलोक मनरेगा कार्यस्थल म गांव वाले मन ल मास्क उपयोग, सोशल डिस्टेंसिंग के पालन संग आन कोविड नियम मन के पालन कराइस। संग म कोविड टीकाकरण म घलोक अपन अहम भूमिका निभाइस। वो ह अपन आस पास के सबो गांव वाले मन ल टिका लगवाए बर प्रेरित करिस।