हो जाव रोमांचक अनुभव खातिर तियार, देश-विदेश ले आहीं पर्यटक

काउंटडाउन शुरू…………… राष्ट्रीय क्षितिज म चमके बर तियार जशपुर
जशपुर जम्बूरी 6 ले 9 नवंबर 2025 तक
स्वरोजगार अऊ पर्यटन ल मिलही नवा आयाम
जशपुर, छत्तीसगढ़ के जशपुर जिला म 6 ले 9 नवंबर 2025 तक भव्य जशपुर जम्बूरी के आयोजन होही। ये महोत्सव जिला के प्राकृतिक सुंदरता, जनजातीय संस्कृति अऊ एडवेंचर स्पोर्ट्स के शानदार संगम होही, जेन जशपुर ल राष्ट्रीय अऊ अंतरराष्ट्रीय पर्यटन मानचित्र म नवा पहिचान देवाही।
मुख्यमंत्री श्री विष्णुदेव साय कहिस के- ‘‘हमार लक्ष्य हे के जशपुर के प्रकृति अउ  संस्कृति ल राष्ट्रीय पहिचान मिलय। जशपुर जम्बूरी 2025 न केवल छत्तीसगढ़ के सांस्कृतिक पहिचान ल सशक्त करही, बल्कि पर्यटन, उद्यमिता अऊ सामुदायिक सहभागिता ल घलोक नवा ऊर्जा देही। ये आयोजन राज्य खातिर गौरव अऊ विकास दुनों के चिन्‍हारी बनही अऊ स्थानीय युवा मन खातिर रोजगार अऊ आत्मनिर्भरता के नवा अवसर खोलही। जशपुर जम्बूरी जइसे आयोजन छत्तीसगढ़ ल एडवेंचर टूरिज्म हब बनाए के दिशा म ऐतिहासिक कदम हे। ये सिरिफ पर्यटन भर नो हे, बल्कि स्थानीय युवा मन खातिर रोजगार, आत्मनिर्भरता अऊ सांस्कृतिक गरब के घलोक उत्सव है‘‘।
जशपुर जम्बूरी केवल एक मनोरंजक आयोजन नो हे, बल्कि स्थानीय स्व-सहायता समूह मन, युवा कारीगर मन, गाइड्स अऊ होमस्टे संचालक मन खातिर रोजगार अऊ स्वरोजगार के प्रमुख माध्यम घलोक हे। 2024 म पहली पइत आयोजित ये कार्यक्रम पउर साल मनखे मन के बीच बहुत लोकप्रिय होइस अऊ ए पइत एला अऊ विस्तार देहे के तियारी करे गए हे।