जशपुरनगर : गरमी के मौसम म ईब नदी नहर के पानी ले किसान मन के खेती लहलहाए लागिस

जशपुरनगर, जशपुर जिला के दूरिहा-दुरिहा बसे गांव के करीबन 3 हजार किसान मन जल संसाधन विभाग जशपुर के ईब व्यपवर्तन योजना के लाभ उठा के कुनकुरी क्षेत्र म रबी अऊ खरीफ के दू फसल लेके खुश हें। गरमी के मौसम म किसान मन ल खेत मन म सिंचाई बर नहर ले पानी आसानी ले मिलत हे जेखर से किसान मन के खेत म हरियाली लहराए लगे हे।
जल संसाधन विभाग के कार्यपालन अभियंता विजय जामनिक ह बताइस कि कुनकुरी विकासखंड के ग्राम जोरातराई, रेंगारघाट, बासनताला, हस्तिनापुर, चटकपुर अऊ नवाटोली के किसान विभाग के योजना के तहत् ईब नदी के पानी के उपयोग करत हें। जोरातराई के किसान पंकज कुमार चौहान अऊ रामसेवक राम, मेघनाथ, बेनेदिक कुजूर ह अपन 1-1 एकड़ के खेत म गरमी के मौसम म बरबटी, लौकी, मक्का, मिर्चा, टमाटर अऊ हरीयर साग-सब्जी लगाए हें। उमन बताइन कि दूनो सीजन म खेती करे बर पानी ईब नदी ले आसानी ले मिल जात हे।
जल संसाधन विभाग के एसडीओ एल.के.तिग्गा अऊ इंजीनियर बाल कुवर साय ह बताइस कि ईब नदी म एलबीसी अऊ आरबीसी तट दू लाईन ले किसान मन ल पानी देहे जात हे। ईब नदी के पानी किसान मन बर छोड़े जाथे। उमन बताइन कि खरीफ सीजन म आर.बी.सी. के तहत् 764 हेक्टर म अऊ एलबीसी तहत् 1025 हेक्टर म करीबन 1900 हेक्टेयर म फसल लगाए जाथे। अइसनहे रबी सीजन म आरबीसी के तहत् 77 हेक्टेयर म अऊ एलबीसी के तहत् 74 हेक्टेयर करीबन 151 हेक्टर म फसल लगाए गए हे। दुनों सीजन म किसान मन ल लाभ मिलत हे।
किसान मन ह बताइन कि दू फसल लेहे ले अब उंखर आर्थिक स्थिति बेहतर हो गए हे। घर म खाए बर घलोक साग-सब्जी हो जाथे अऊ स्थानीय बाजार म बेंचे म एक सीजन म 80-90 हजार तक आर्थिक लाभ हो जात हे। किसान मन ह बताइस कि अपन परिवार के संग खुशहाल जीवन यापन करत हें। नहर ले पानी के सुविधा देहे खातिर छत्तीसगढ़ शासन अऊ जिला प्रशासन ल उमन धन्यवाद देहे हें।