केश्वर राम ह अनुदान राशि अऊ अपन के बचत राशि ले सुंदर अउ समय म बनाइस पक्का घर
पक्का घर म अब केश्वर अऊ परिवार चिंतामुक्त होके करत हें खुशाल जीवन यापन
जशपुर, 11 जुलाई 2024। महल होवय या झोपड़ी अपन घर अपन होथे, हर मनखे के एक सपना होथे के छांव बर ओखर एक खुद के घर होवय। खुद के घर होए ले कई ठन फायदा हे, अपन घर मनखे ल वित्तीय सुरक्षा देथे, एक घर ल अपन घर कहे म जेन गौरव के अनुभूति होथे, उही सपना सरकार कोति ले साकार करे जात हे। समाज के आर्थिक रूप ले कमजोर तबके के भलाई बर भारत सरकार ह प्रधानमंत्री आवास योजना संचालित करत हे।
प्रधानमंत्री आवास योजना के मुख्य लक्ष्य हे कि गरीबी रेखा ले नीचे जीवनयापन करइया हर परिवार ल अपन खुद के घर मिल सकय ताकि उनला किराया के घर झन लेहे ल परय। भारत सरकार के इही उददेश्य ल पूरा करे के दिशा म छत्तीसगढ़ म घलोक श्री विष्णु देव साय के नेतृत्व वाले राज्य शासन ह ए महत्वकांक्षी योजना ल शत् प्रतिशत् पूरा करे म कोनो कसर नइ छोड़े हे। नगर अउ ग्रामीण इलाका मन म रहइया निर्धन मनखे मन ल उंखर क्रयशक्ति के अनुकूल प्रधानमंत्री आवास योजना के तहत् घर प्रदान करे जात हे।
इही कड़ी म राज्य के जशपुर जिला के दुलदुला विकासखण्ड के ग्राम दुलदुला निवासी केश्वर राम ल प्रधानमंत्री आवास योजना-ग्रामीण अंतर्गत पक्का घर मिले हे। जब ए ल घर मिलीस त ओ हर ए योजना के महत्व ल समझत घर ल बड़ उत्सुकता लगन के संग अनुदान राशि अऊ खुद के बचत राशि ल मिला के बहुतेच सुंदर अउ समय म पक्का घर बनाइस। ओ हर शासन के महत्वकांक्षी योजना मन ल शत् प्रतिशत् पूरा करके ग्राम पंचायत अउ शासन के सहयोग करके गौरन्वित होए के काम करे हे। केश्वर के परिवार म वोकर पत्नी जुगनी बाई, 1 पुत्र अऊ 2 पुत्री निवासरत हे। केश्वर ल घर 2019-20 म स्वीकृत होए रहिस जेन अब पूरा हो गए हे। पक्का घर बन जाय ले अब केश्वर के परिवार चिंतामुक्त अऊ खुशाल जीवन यापन करत हे। पहिली इंकर परिवार एक छोटकुन कच्चा अउ जर्जर मकान म रहके मजदूरी अउ खेती के काम करके अपन परिवार के भरण पोषण करत रहिस। कच्चा मकान म अपन पत्नी अऊ लइका मन के संग मुश्किल ले जीवन यापन करत रहिन। कच्चा जर्जर मकान म कई प्रकार के परेशानी मन के सामना करना परत रहिस, जइसन बारिश के मौसम म छत ले पानी टपकना, जमीन म सिलन आना, हर साल घर के छत के लकड़ी ल बदलना अऊ जहरीला जीव जंतु ले डर भय बने रहय।
केश्वर प्रसाद अऊ ओखर परिवार अब पक्का मकान मिले ले खुशी-खुशी जीवन यापन करत हे। ए मन ल स्वच्छ भारत मिशन के तहत शौचालय, उज्ज्वला योजना के तहत गैस अउ आन सरकारी सुविधा मन के घलोक लाभ मिलत हे अऊ उमन प्रधानमंत्री अउ प्रदेश के मुख्यमंत्री ल धन्यवाद ज्ञापित करे हे।
