नाशपाती के मांग आन राज्य मन के संग बड़े शहर म हे
किसान विरेन्द्र ह साल म नाशपाती ले 3 लाख के करथे आमदनी
किसान आज अपन परिवार के संग खुशहाल जीवनयापन करत हे
जशपुरनगर, जशपुर जिला के दूरस्थ अंचल के किसान अपन खेत मन म साग-सब्जी के संग चाय, काजू, मिर्च, टमाटर, आलू अऊ नाशपाती के बनेच खेती करत हें। बगीचा विकास खंड क्षेत्र के पठारी क्षेत्र मन म व्यापक पैमाना म नाशपाती के पैदावार होवत हे। अऊ किसान मन ल एखर से अच्छा मुनाफा घलोक मिलत हे। जेखर से उंखर जीवन स्तर ऊंचा उठत हे अऊ ओ मन आत्मनिर्भर बनत हें। कलेक्टर श्री रितेश कुमार अग्रवाल के मार्गदर्शन म किसान मन ल खेती के क्षेत्र म आगू बढ़ाए बर सार्थक प्रयास करे जात हे। ग्रामीण अर्थव्यवस्था ल मजबूती मिलय अऊ किसान आर्थिक रूप ले संपन्न बनय एखर बर कृषि विभाग, उद्यान विभाग, मत्स्य विभाग कोति ले ओ मन ल छत्तीसगढ़ शासन के अंतर्गत संचालित कई ठन योजना मन ले लाभान्वित करे जात हे। संगेच ओ मन ल आधुनिक खेती के जानकारी देहे जात हे ताकि जिला के किसान कम लागत ले बनेच आमदनी कर सकयं।
उद्यान विभाग के सहायक संचालक श्री आर.एस.तोमर ह बताइस कि जिला के किसान मन ल नाशपाती के खेती के प्रति बढ़ावा देहे बर उद्यान विभाग के फल क्षेत्र विस्तार योजना अऊ नाशपाती क्षेत्र विस्तार योजना ले लाभान्वित करे जात हे। बगीचा विकासखंड के लाभांवित किसान श्री विरेन्द्र कुजूर उद्यान विभाग के नाशपाती क्षेत्र विस्तार योजना के लाभ लेके अपन उद्यान म 250 पेड़ लगाए हे। ओ ल प्रतिवर्ष नाशपाती फल ले बनेच आमदनी होवत हे। वो ह साल 2021-2022 म फलदार पौधा ले साल म करीबन 3 लाख रुपिया आय प्राप्त करे हे। किसान अपन परिवार के संग आज खुशहाल जीवन यापन करत हे।
उद्यान विभाग ले मिले जानकारी के मुताबिक जशपुर जिला म करीबन रकबा 750.00 हेक्टेयर म नाशपाती के उत्पादन होवत हे अऊ 660 मि.टन नाशपाती के उत्पादन जिला म होवत हे। जिला के करीबन 1700 किसान नाशपाती खेती ले लाभ प्राप्त करत हें। अभीन बगीचा के पठारी क्षेत्र मन के नाशपाती के मांग आन राज्य के संगे संग बड़े बड़े शहर म घलोक होए लगे हे। जशपुर जिला के नाशपाती के दिल्ली उत्तर प्रदेश रांची के आन राज्य मन म घलोक बड़ संख्या म मांग होवत हे अऊ नाशपाती भेजे जात हे। योजना मन ले लाभान्वित किसान मन ह छत्तीसगढ़ शासन अऊ जिला प्रशासन ल धन्यवाद देहे हें।
