मां खुड़िया रानी स्व-सहायता समूह के महिला मन नाशपाती बेंच के बढ़ावत हें आमदनी

जशपुरनगर, 17 जुलाई 2021। जशपुर जिला म महिला मन ल आर्थिक रूप ले संबल बनाए बर जिला प्रशासन के माध्यम ले कई ठन योजना ले जोड़के लाभांवित करे जात हे। संगेच नवाचार के माध्यम ले घलोक ऊंखर आर्थिक स्थिति ल मजबूत करे के प्रयास करे जात हे।
एही कड़ी म बगीचा तहसील के मां खुडिया रानी महिला कृषक उत्पादक संगठन ह वैल्यू चेन मार्केटिंग के तहत् काम चालू करे हे। जेखर से उमन सना कल्स्टर ले अपन जिला म जादा मात्रा म होवइया फल नासपाती ल दूसर जिला के संग आन राज्य मन ल उपलब्‍ध कराए बर प्रयास कर हे। उमन 27 क्विंटल नाशपाती के खरीदी सन्ना के किसान मन ले करके ओला पड़ोसी जिला रायगढ़ म बेंचे हें।
मां खुड़िया रानी महिला स्व-सहायता समूह के महिला मन ह बताइन कि जशपुर जिला म वन सम्पदा के कोनो कमी नइ हे। वो मन एखर से घलोक अपन आमदनी ल बढ़ाए के प्रयास करत हें। जेखर बर उमन नाशपाती फल ल जिला के बाहिर सप्लाई करके एखर शुरूआत करे हें। उमन बताइन कि ओ मन ल पहली शुरूआत म ही 7,500 रुपए के आर्थिक लाभ मिले हे। जेखर से समूह के महिला मन म काफी प्रसन्नता व्याप्त हे। उमन ये काम ल आगू बड़का पैमाना म करे के तैयारी करत हें जेखर से ओ मन ल भरपूर राशि के लाभ हो सकय।
जानबा हे कि जसपुर जिला म नाशपाती के खेती बड़का पैमाना म करे जाथे। जिला के बगीचा-सन्ना क्षेत्र के किसान एखर खेती जादा मात्रा म करत हें। किसान मन ह दीर्घवर्ती फसल के लाभ लेत नाशपाती ल अपन खेत मन म लगाए हें। जेखर से ओ मन ल प्रति साल अच्छा मुनाफा हो जाथे। अब एकर लाभ जिला के महिला स्व-सहायता समूह घलोक उठाए लगे हे। एखर से ऊंखर आर्थिक स्थिति सुदृढ़ होही संगेच जिला म फरे नाशपाती दूसर जिला अऊ आन राज्य मन म घलोक बेंचाही।