धरमजयगढ़-पत्थलगांव-लोहरदगा नवा रेल लाइन परियोजना ला केंद्र सरकार के अधिसूचना, विकास के नवा जुग म प्रवेस करही क्षेत्र
मुख्यमंत्री श्री विष्णु देव साय के सरलग उदीम ले पूरा होईस दसकों पुराना सपना
रायपुर, जशपुर जिला के विकास के इतिहास म एक ऐतिहासिक उपलब्धि दरज होए हे। भारत सरकार के रेल मंत्रालय डहर ले धरमजयगढ़-पत्थलगांव-लोहरदगा नवा रेल लाइन परियोजना ला बिसेस रेल परियोजना के रूप म अधिसूचित करे के संगेच जशपुर ला पहिली पइत रेल नेटवर्क ले जोड़े के रस्ता साफ होगे हे। ये सिरिफ एक ठन रेल परियोजना नो हे, भलुक पूरा क्षेत्र के सामाजिक, आर्थिक अऊ औद्योगिक विकास के नवा अऊ मजबूत नेव आय।
लगभग 291.881 किलोमीटर लंबा ये बड़का रेल लाइन रायगढ़ जिला के धरमजयगढ़ ले सुरू होके जशपुर जिला के पत्थलगांव होत झारखंड के लोहरदगा तक जाही। परियोजना के सुरू होय ले जशपुर जिला सीधा राष्ट्रीय रेल नेटवर्क ले जुड़ जाही अऊ क्षेत्र के विकास ला एक नवा गती मिलही।
ये ऐतिहासिक उपलब्धि प्रधानमंत्री श्री नरेंद्र मोदी के अगुवई म देसभर म विकास करे जात आधुनीक आधारभूत संरचना अऊ मुख्यमंत्री श्री विष्णु देव साय के बिसेस उदीम के नतीजा आय। बरसों ले क्षेत्र के मनखे मन डहर ले करे जात रेल संपर्क के मांग अब पूरा होय के दिसा म आखिरी अऊ बड़का फैसला तक पहुंच गे हे।
रेल मंत्रालय डहर ले भारत के राजपत्र म छपे अधिसूचना के मुताबिक रेल अधिनियम, 1989 के प्रावधान के तहत जनहित अऊ राष्ट्रीय अवसंरचना विकास ला ध्यान म रखत ये परियोजना ला अधिसूचित करे गे हे। अधिसूचना के छपे के संगेच परियोजना औपचारिक रूप ले लागू होगे हे।
