जशपुरनगर, मुख्यमंत्री श्री विष्णुदेव साय के अगुवाई म छत्तीसगढ़ राज्य के किसान मन ला कृषि विभाग के योजना मन ले लाभ पहुँचाए जात हे। विभाग कोति ले किसान मन ला सही रद्दा देखाए जात हे अउ खरीफ के संगे-संग रबी फसल के खेती करके लाभ कमाए बर बढ़ावा देहे जात हे, ताकि किसान मन ला बढ़िया आमदनी मिल सकय।
मनोरा विकासखण्ड के ग्राम सोगड़ा म रहइया कीना राम खरीफ फसल के संगे-संग रबी फसल के खेती करके अउ जादा फायदा कमात हे। किसान श्री कीना राम ह बताइस के कृषि विभाग मनोरा के ग्रामीण कृषि विस्तार अधिकारी ह रबी के खेती करे बर बताइस अउ एनएफएसएनएम (NFSM) योजना के तहत एक एकड़ भुँइया बर बढ़िया किसम के गेहूं बीजा कम दाम म देवाइस।
किसान ह बताइस के बढ़िया से खेत ला बना के ओमा सही मात्रा म गोबर खातू डारिस अउ समे-समे म पानी दीस अउ खरपतवारके निदंइ घलो करिस। गेहूं के फसल म कोनो किसम के जादा कीरा-बीमारी के तकलीफ नहीं होइस अउ उपज घलो बहुत बढ़िया मिलिस।
किसान कीना ह बताइस के ओहा एक छोटे किसान आय, ओकर तीर कुल 0.800 हेक्टेयर खेती के भुँइया हे। पहिली खरीफ म सिरिफ धान के फसल लगावत रहिस। बाकी रबी म खेत ला अइसने छोड़ देत रहिस, जेकर से चाउर तो मिल जावत रहिस फेर कभू-कभू आन खाय के चीज जइसे गेहूं ओला बजार ले बिसाए बर परत रहिस।
रबी फसल के फायदा
धान के फसल के बाद गेहूं फसल ला बेचे ले बढ़िया आमदनी होथे। चाउर के संगे-संग गेहूं ले आटा घलो मिल जाथे, खाली समे अउ साधन के घलो सही उपयोग हो जाथे, अउ बढ़िया गुन वाले गेहूं मिलथे। रबी म खेत खाली छोड़े के जरूरत नइ परय।
किसान श्री कीना राम ह जम्मो किसान भाई मन ला खरीफ फसल के संगे-संग रबी फसल के खेती करे अउ रबी म दलहन-तिलहन के घलो खेती करे के गोहार पारे हे, ताकि कम समे अउ कम लागत म बढ़िया कमाइ हो सकय अउ अपन बर जरूरी खाय के समान घलो उपजा सकन। ओहा रबी फसल के खेती बर सही रद्दा देखाए खातिर कृषि विभाग अउ छत्तीसगढ़ सरकार ला धन्यावाद दीस।